四季椰林海南椰子雞 (MOKO新世紀廣場)

營業中

休息中

在Openrice訂了6月8日下午16:00的台，當時注明要靠窗口座住，我哋一行4人準時到達，到咗門口侍應問咗我電話就叫我坐門口通道位置，我話我係訂靠窗口位置，佢先無辦法俾我入去坐。啱坐落我仲未點餐，佢就唔知俾咗煲乜我，我話我未點餐唔係我嘅，嗰個女侍應就話：係咁㗎，係湯底。我打開一睇，裡面有菜有肉，菜同肉係湯底？佢先過嚟拎走，話係員工餐上錯咗。到咗點餐想搵一個人問下，完全無人理你，有幾個坐係度食飯，有幾個坐係度開會，有幾個就係門口傾計，我大聲叫咗兩次「唔該」先有一個咁啱係行入嚟嘅阿姐幫我。落咗單好耐，之後發現出餐位置擺咗碟雞，冇侍應過嚟幫客人出餐，出餐位置直頭一個人都無，於是乎我又叫兩聲「唔該」，一位坐係度食緊飯阿姐企起身應我，佢見到附近冇人，於是走過來幫我拎碟雞過嚟，幫我開埋個電子爐，話湯滾佢先幫我落雞，我問佢係咪要客人自己去上餐，佢話佢哋食緊飯，我話即使食緊飯，都要有一個人喺度睇下客人有咩需要㗎。過咗5分鐘湯亦都滾咗，我望望附近又係冇人，於是乎我第三次叫兩聲「唔該」，有位着白色衫嘅女經理走過嚟，我話湯滾咗又冇人幫我落碟雞，佢話啲人喺度食緊飯，我話打開門做生意就算喺度食緊飯係咪應該都要俾一個人出嚟幫下客人？而且我見到有幾個人喺門口傾偈！檸檬水又有冇，又搵唔到人加水。我想叫飲品同酒，佢全部都冇，其實未準備好係咪唔應該開業呢？上菜專擺你右手邊阻住你食嘢，我哋點咗鯇魚、毛肚、心形粉、筍亦都係完全搵唔到侍應去問到底要煮幾多分鐘，我哋都係求其食完就算，真係冇下次。到咗埋單，餐飯$528，我俾咗兩張$500，收錢白色衫女經理都話佢哋冇散紙找，之後我拎返張$500就換咗張$100俾佢，佢又係話冇散紙找，可望下佢部收銀機，佢部收銀機一張散紙都冇，最後搵我媽媽湊夠$30，佢先找返$2俾我。開門做生意居然冇備到散紙，真係搞笑，呢餐椰子雞真係食到好攰，絕對冇下次！