迪士尼粉絲等咗好耐嘅迪士尼好萊塢酒店，即將準備以全新面貌重開啦！正所謂「去迪士尼做足準備」，而家即刻同大家率先做個預覽啦！

酒店將於7月14日重新開放，一踏入酒店大堂，已經有多幅迪士尼/Pixar/Marvel經典作品同角色嘅藝術畫作，粉絲們有排打卡。另外仲有兩間均以落地大玻璃為裝潢，可以望住外邊園林景嘅主題餐廳，當然唔少得精品店啦，仲有限量同限定嘅獨家精品添。

色彩繽紛調色盤   藝彩廚

酒店當然唔少得自助餐啦，呢間buffet仲要係特意向華特迪士尼動畫製作室傳奇嘅Ink & Paint部門致敬，全間餐廳由內到外，無論係設計裝修、餐具定係菜單，都係色彩繽紛，感覺就好似調色盤一樣，仲有幅15米長嘅卡通壁畫，粉絲打卡一流！

首先要介紹一個喺buffet好少見過嘅corner——墨西哥Taco！大家可以自己選擇心水口味嘅taco，食材主要都係嚟自墨西哥，有啲更要訂成2個月先有貨！五顏六色嘅taco係以天然材料製作，好似紫色嘅係紫薯、綠色嘅係菠菜，揀好之後就有大廚為你即叫即製，Taco皮脆卜卜架。

另外，沙律同意粉都係自家製，並且標榜以健康同天然食材製作。6款唔同顏色嘅沙律醬包括紅菜頭醬、半風乾番茄醬、以椰子蓉打成嘅咖喱等，仲配有自家製嘅taco bowl添；至於意粉亦同樣有紅、綠、黑等顏色，分別係以番茄、菠菜同墨魚汁等製。

但數到最特別嘅一定係當中2款可以自行DIY，畀大家化身成小畫家嘅甜品同飲品，絕對係必食必玩item！調色盤曲奇造型就同調色盤無異，附有畫筆畀大家沾上朱古力醬或其他醬料，將曲奇變成畫冊，喺上面自由創作；而調色杯則係西柚梳打做base，另外附上兩支士多啤梨同芒果糖漿唧唧筆，同樣可以喺泡沫上面揮筆畫畫，不過，畫完應該會唔捨得飲咗自己嘅大作。

Marvel主題酒廊   留映廳

Marvel迷就一定要嚟朝聖喇，呢間酒廊以好萊塢電影資料館為設計主題，餐廳門口旁有巨型打卡牆，而餐廳入面除咗有一眼就會望到嘅無限寶石同Thanos無限手套外，仲有啲隱藏彩蛋畀大家自己發掘。

餐廳主要供應西班牙小食以及雞尾酒，啲酒仲要係超級英雄主題，由顏色、裝飾到調酒杯等都經過精心設計，好似形象鮮明嘅「能量裝置」，紅黃雙色加上發光冰塊，一睇就知係Ironman嘅代表。選用紅酒、接骨木花同芒果調配而成，味道帶有花香同果香。黑麻麻嘅「沙漏斑紋」，配合返嚟自俄羅斯嘅黑寡婦，以伏特加為基酒，加埋濃縮咖啡同榛子酒，上枱時再加埋煙霧泡泡，成件事又型又cool，煙熏味聞落幾濃，但飲嗰陣就主要係咖啡甘香嘅味道。其餘幾款主題雞尾酒包括美國隊長「超級戰士」、變形俠醫「伽瑪射線」、雷神「雷擊」同鷹眼「箭術高手」，小朋友一樣可以cheers，有無酒精版本選擇呀嘛。

食物方面，款式唔算好多，4款冷盤6款熱食加2款甜品，大多都好適合佐酒。「馬鈴薯拼湊」小食拼盤就以4種唔同烹調嘅方法去煮薯仔，分別有香口嘅鴨油薯條、煙熏味重嘅紫菜辣香薯片、脆炸松露薯球同埋芝士煙肉焗薯皮。
甜品尤其吸睛，美國隊長青檸撻微酸，感覺小清新，加咗塊盾牌特別sharp；雷神之錘朱古力聯盟嘅心太軟，更有微辣口感，打卡之餘味道亦唔錯。

藝彩廚 
地址: 大嶼山香港迪士尼樂園迪士尼好萊塢酒店地舖

留映廳 
地址: 大嶼山香港迪士尼樂園迪士尼好萊塢酒店地舖

文：Kar
相、片：Tom