嚟到9月份夏天又過咗一大半啦，想捉緊夏天嘅尾巴，係時候約閨蜜們去嘆個下午茶～近月有唔少餐廳推出下午茶，夏日水果主題同慶祝初秋來臨嘅秋色下午茶都有，間間都好啱影相呢！

目錄

The Jackson Box 下午茶 The Lounge

Scone係食下午茶嘅必備item！呢間酒店餐廳同本地品牌 Jackson's Scone 合作，推出全新「The Jackson Box 下午茶」。設有四款鹹點及三款甜點，每款都好精緻，包括招牌原味鬆餅及期間限定柚子味鬆餅，充滿牛油香，柚子味加入天然蝶豆花粉，呈寶藍色好啱打卡！藍莓芝士蛋糕、炸開心果及阿馬菲檸檬西西里卷同招牌提拉米蘇都一樣咁出色。鹹點包括手指三文治、黑松露火腿餡餅以及配上煙熏希靈魚魚子醬嘅日本蛋黃慕斯。

花漾秋色下午茶 The Farmhouse咖啡廳 

呢間酒店同巴黎時尚品牌合作推出花漾秋色下午茶，融合咗品牌獨特嘅花卉同貓咪圖案，一系列嘅鹹甜點都好吸引～甜點有石榴乳酪手袋蛋糕及抹茶紅桑子金磚蛋糕等，啱晒相機食先，鹹點如香酥填鴨刈包及龍蝦沙律餡餅等都幾高質素㗎。最開心唔止有無限量供應嘅法式紅酒煮車厘子、牛角酥窩夫及可麗餅配雪糕，而且仲可以免費使用酒店頂樓IG-able無邊際泳池添啊，驚唔驚喜？

抗氧亮澤美肌下午茶 視佳廊 

食下午茶之餘仲可以美肌？呢個抗氧亮澤美肌下午茶以抗氧化精華為靈感，採用多款具抗氧力嘅天然食材如青蘋果、檸檬及柚子製成鹹甜美點，愈食愈靚呀～招牌薄荷檸檬撻香脆鬆化，配上新鮮檸檬果肉混合薄荷調製而成嘅餡料，清新酸甜。香橙伯爵茶奶凍奶味香滑濃厚，加上以血橙果蓉及橙皮混合而成嘅果醬，香氣獨特。

英式及泰式下午茶 Amazing 

平時食Afternoon tea多數都以英式為主，呢間嘅下午茶分別供應英式同泰式，想有個新鮮體驗嘅話，推介大家試下泰式呀～泰式下午茶設5款鹹點及5款甜點，鹹點有唐人街豚肉鬆花生伴西瓜沙律、泰式炸蝦餅同金不換辣炒肉碎伴蒜茸包等。甜點就有冰花燕窩迷你蛋撻、彩虹千層糕同巧克力香蘭葉蛋糕卷，好地道。

味遊韓國X草莓樂園下午茶自助餐 Le Menu 

 圖：酒店Facebook

平時下午茶細細份唔夠食嘅，呢個味遊韓國X草莓樂園下午茶自助餐就啱晒啦，可以任飲任飲4個鐘！供應多款韓式前菜、熱食、精選草莓甜品及Häagen-Dazs雪糕。韓式食物有紫菜包飯、韓式餃子、炒粉絲、炒年糕及魚糕湯等。除咗草莓甜品，最特別係現場設有掛滿新鮮草莓嘅草莓牆供採摘呢，好似去咗旅行咁開心～

仲夏 ‧ 香芒 ‧ 燕薈 中西下午茶套餐 中間道酒吧

 圖：酒店Facebook

同樣以水果為主題，呢個下午茶就主打當造嘅芒果。甜點有鮮芒果燕窩牛角窩夫，香脆嘅牛角窩夫夾住香甜嘅芒果醬再加燕窩點綴，食落幾清新。另外仲有燕窩蜂蜜香芒奶凍、香芒熱情果凍湯及芒果瀑布芝士餅等。鹹點有日式和牛包配香芒醬，和牛同香芒醬意想唔到嘅夾，中和到和牛油膩；另有慢煮波士頓龍蝦酥盒、粉紅松露素菜餃及沙律醬蝦多士等，好豐富。

文: Yanica
編：Kar