暑假期間大家去邊度食多？十強榜內，銅鑼灣嘅餐廳佔多數喎，當中又以特別主題嘅環境裝修取勝。
第10位 悉尼樂園（*新上榜） 
圖：lankiman6330、cindy_ting_ting
銅鑼灣樓上Café，裝修懷舊，每個角落都佈置成打卡位。喇沙龍蝦汁‧大蝦長通粉頗受客人歡迎，大蝦大大隻，爽口彈牙，長通粉索晒龍蝦汁好惹味。另外推介招牌鹽燒牛舌畀牛魔王，塊塊都勁厚切，肉質軟腍，食完有種滿足感。
第9位 Hashtag B（*新上榜）
圖：一開業已經人氣高企嘅麵包店，因為27層千層拿破崙蛋撻而聞名。啖啖焦糖香，撻皮鬆脆，蛋撻凍食又得熱又得，視乎你想要燉蛋定流心口感。8月有新品鮮雲呢拿士多啤梨泡芙，新鮮手打雲呢拿忌廉，加埋自家製士多啤梨醬，酸酸甜甜仲要有果肉，夠晒開心。
第8位 Cakebearbear（*新上榜） 
圖：connie_whm、輕鬆豆*HappyMealFamily
從蛋糕網店做至實體店嘅呢間餐廳，以熊仔主題作招徠，加上以粉藍粉紅夢幻色系為主調，輕易吸引唔少女生去打卡。明太子忌廉大蜆意大利粉擺盤幾靚嘅，一隻隻蜆插晒喺碟邊好似成朵花咁，份量足又鮮甜。但講到必食，一定要留肚畀甜品，無論係慕絲蛋糕定係窩夫，都有隻立體睡眠熊，cute到震，完全唔捨得食。
第7位 本延鍋物（*新上榜）
圖：joyceclt
主打日式涮涮鍋同壽喜燒嘅日本料理，供應幾款唔同部位嘅熊本黑毛和牛套餐，有A4、A5揀。黑毛和牛肉眼A5脂肪油花豐富，軟嫩多汁；色澤偏紅嘅極上黑毛和牛A4油花冇咁多，但肉味較濃郁，各有捧場客。
第6位 臺北棧
圖：由港島開到過九龍嘅台灣菜餐廳，過咗海繼續都係咁受歡迎。食台灣嘢梗係要食牛肉麵，揀埋麻辣牛肉麵就更刺激，麵款可選手工刀削麵或台灣寬粉絲。推介芋泥控可試芋泥提拉米蘇，好少見呢個組合，芝士中間有層芋泥夾層，香甜但少膩。
第5位 就是偏偏喜歡你
圖：雖然約人去呢間餐廳食，講餐廳名嗰陣少尷，但去到成個環境氣氛都勁靚就冇所謂啦，仲要係少有食物質素同樣被讚賞嘅打卡餐廳。粉紅乾花牆絕對係打卡靚位，原來仲係由花藝師主理，唔怪得咁靚啦。推介招牌慢煮10小時巨豬肋骨，真心巨架，香口嫩腍又惹味。另外，呢度更係社區共融餐廳，值得支持啊。
第4位 小火山（*新上榜）
圖：泰國紅咗一排嘅泰豬鍋嚟到香港，自然有叫座力啦，可以一次過又食燒肉又打邊爐，大滿足。湯底有得揀鴛鴦鍋，牛骨湯底味較濃香，椰汁湯底則較清香。食泰菜最尾一定要食芒果糯米飯，呢度仲用咗蝶豆花製作，賣相精美。
第3位 本命（*新上榜）
圖：性價比幾高嘅一間鐵板燒餐廳，口碑唔錯，各款菜式設計見心思。金鯛立鱗燒配甘荀魚湯忌廉汁嘅重點當然係啲企身嘅魚鱗，脆卜卜，魚肉鮮甜嫩滑。仲有平時較少見嘅黑豚薄餅，薄餅內捲住薄切黑豚肉、洋蔥同生薑絲，口感豐富。
第2位 營足四季（*新上榜）
圖：露營裝置嘅餐廳通常都比較受歡迎，觀塘呢間都唔例外。餐廳內無論桌椅擺設都係露營主題，仲要有塊草披地墊同埋露營車，都幾好feel。幾乎枱枱都會嗌巨型豬扒配薯條扒菜，堅厚堅大塊扒，但依然保持到好juicy同鬆軟，外層脆邊，人多share食幾開心。
第1位 Exotica Gelatea
圖：繼續留榜嘅漢堡店，最貼心就係burger有好多個唔同size揀，最細嘅tasting size都得。和牛漢堡好多肉汁好juicy，配埋半溶芝士、生菜、番茄，層次豐富。同埋記得留肚食gelato喎，自家製架，有好多款味，例如香蕉朱古力、榴槤、椰子菠蘿等，
文：Kar
