香港人特別鍾意日本菜就唔使講，尤其是壽司刺身，長期見到唔少壽司店都大排長龍。其實除咗連鎖店以外，香港仲有好多壽司小店等你發掘。今次就介紹其中5間親民價嘅壽司小店畀大家。

師傅席前即製 玥屋

平時鍾意瓹窿瓹罅搵好食日本嘢嘅朋友，應該聽過呢間壽司店嘅名～店舖細細所以一位難求，想食一定要打電話去book～咁受歡迎係因為佢哋可以用親民嘅價錢享受到廚師發辦嘅感受，所有壽司都係師傅席前即整，以價錢嚟講質素都好高～最平選擇有赤貝、三文魚等都唔使$10，另外蔥吞拿魚腩、炸蝦卷、玥屋蛋同海膽都好推介，有時好彩仲會食到啲當造壽司，如秋刀魚刺身等。

圖: trying

火炙壽司系列 炙   

主打即叫即做嘅火炙壽司，最平$6件就食到！壽司全部由師傅手握而唔係用機器，客人點單後先用火槍炙燒新鮮食材，最受歡迎嘅火炙系列有三文魚及三文魚腩皇，選用挪威三文魚，火炙過後魚油香突出，好肥美～厚切鰻魚燒汁香甜而且鰻魚肉質都幾結實；霜降牛肉用嘅係安格斯牛小排，燒過後牛香味突出而唔會太油膩。仲有雙拼手卷都必食，如鵝肝海膽手卷及蟹膏海膽手卷等，啖啖都係鮮味！

圖: Kt.foodnote

將軍澳人龍壽司店 鮪世市場  

有種令人置身於日本魚市場旁嘅壽司店一樣。食物方面主打手握壽司同丼飯，每款食材都好新鮮，一樣會有師傅於bar枱前即叫即整，必試當然有中拖羅、大拖羅、海膽同牡丹蝦，新鮮又鮮甜。特別啲仲有火灸鵝肝、金目鯛同極上本鮪魚鮫，性價比好高。另外佢嘅醋飯都做得唔錯，酸度恰到好處。最近餐廳喺旺角開埋分店，唔使山長水遠去食啦～

圖: laihinfung

平價夾大件 卷之卷

講到大件夾抵食真係非粉嶺呢間外賣店莫屬～大部份壽司都係$10以下就食到，如三文魚腩、象拔蚌及鰻魚等～珍寶赤海蝦同鮮帶子都只係$13、$15，火炙系列都好受歡迎～唔好以為平嘢無好嘢，大部分壽司質素都唔錯，係略嫌啲飯大嚿咗少少。

圖: foodiez.la、小熊.維妮

抵食特大海膽壽司 庭壽司外賣專門店

被青衣人稱為隱世壽司嘅小店～一樣高質抵食，唔同嘅係有唔少特色壽司，如火炙白腩，白腩係三文魚最肥美嘅部位，魚油香味好重，入口即溶。火炙芝士玉子都係人氣之選，一入口好香濃～另外特大海膽壽司只係$30，鮮甜無腥味，抵食呀。

圖: cathyluiiiii

文: Yanica