白色系餐廳嘅魅力相信好多女仔都抵擋唔住，環境舒服之餘仲啱晒打卡。今期介紹4間以純白作主題嘅餐廳畀大家，唔係淨係有咖啡店，連日式涮涮鍋同純白裝潢嘅西餐都有，快啲睇定然後bookmark喇！

目錄

極簡純白風日式涮涮鍋 牛陣 HANARE–Platinum Label

有冇諗過打邊爐都有純白裝修呢？呢間人氣日式涮涮鍋最近創立姐妹品牌，裝修以文青風「白調x木系」為主調，簡約雅致，意指讓一切回歸原本，品嚐食材最原始嘅味道。主打鹿兒島自家農場飼養嘅野崎牛，於日本「全國肉用牛枝肉共勵會」中連續兩年獲得最優秀賞～湯底方面都好用心，包括選用日本訂製和風紙火鍋嘅「極」黃金鰹魚湯底，用咗鰹魚、鯖魚、飛魚、昆布及香菇熬成，味道清清地能夠帶出和牛原本嘅甘甜。

圖: or#Tm65481236

歐陸風白色玻璃屋 Pondside

想喺市區又可以享受身處大自然嘅感覺，呢間位於香港公園入面嘅餐廳就啱晒！白色玻璃屋設計，室內裝修以歐陸風為主，空間感十足。窗邊位有得望住人工湖同瀑布，真係咪話唔寫意。食物方面主力供應西餐，推介炭燒豬鞍扒，選用Kurobuta黑豚肉，一啲豬臊味都無，簡單調味已經突出到肉香。另外仲有Clam Linguine with Tarragon Cream Sauce，扁意粉軟硬適中，濃稠柔滑嘅忌廉醬汁配埋大蜆鮮味，一啲都唔覺膩。

圖: eunice2046

大埔人氣湖景餐廳 Billow

大埔小白鷺旁嘅人氣餐廳，環境闊落採光度又好，純白色再加埋湖景真係好IGable，好啱假日特登嚟chill吓。有靚景之餘，食物方面都唔錯，如A4日本和牛肉眼，油脂分布平均肉味又濃厚；燒大虎蝦龍蝦汁扁意粉都唔錯，虎蝦燒得好香肉質又彈，扁意粉都吸收埋蝦嘅鮮味～仲有呢度係寵物友善餐廳，帶埋毛孩嚟放電都無問題。

圖: o__o.foodies

大坑純白打卡Cafe oneday.

大坑一樣都有唔少高質小店，呢間新開嘅咖啡店以純白色為主，舖面唔大，食物同飲品方面都睇得出好有心思。最受歡迎就係Bear Bear Madeleine，係啤啤熊樣嘅瑪德蓮蛋糕！有原味牛油、伯爵茶同朱古力三款口味，質感好鬆軟，建議大家嚟之前預訂咗先～Choco Marshmallow Pie都係人氣甜品，棉花糖翻熱後變得更煙靭黏口，外層朱古力又唔會太甜。

圖: weisikmuimui

文: Yanica