又來到好評餐廳十強嘅時間，今次雖然多咗新餐廳上場，但其實睇真啲大多都係分店為主，一間餐廳做起咗擴展版圖去其他地區，令到更加多人有機會試到都係好事嚟嘅！今個月仍然有長期大熱嘅拉麵、火鍋、韓國菜同café 等等，唔知下個月又有冇咩驚喜出現呢？
第10位 麵道
呢間拉麵店曾經多次上榜，相信大家都唔陌生！人龍經過多月仲係咁長，絕對係實力證明，醬油豚骨湯、伊勢海老豚骨湯及雞白湯三款湯底各有捧場客，最受歡迎係用龍蝦頭、蝦殼同蝦籽熬成嘅龍蝦豚骨湯拉麵，蝦味濃厚又唔算太鹹。小食好似天婦羅無骨雞翼、辛口餃子都相當有水準，唔怪得咁多人專誠去食嘅。
圖：第9位 永興冰室 (*新上榜)
呢間新開嘅冰室位於太子，除咗地道嘅港式茶記美食好似沙嗲牛肉麵茶餐、乾炒牛河等小炒，仲有焗咖喱雞飯多士盒同焗鮮茄豬扒飯多士盒，方型麵包入面釀咗配料同飯，賣相吸引，份量大到足兩個人食！甜品就可以試即叫即製雪山梳乎里，好似人頭咁大，好少茶餐廳會做！另有蕃茄薯仔鰂魚鮮蜆湯、檸檬雞中翼等特色招牌作。
圖：第8位 新泰東南亞餐廳
又再見到新泰上榜，冇計啦天氣愈來愈熱，食酸酸辣辣嘅泰國菜就最開胃！尤其是泰式生蝦，蝦肉處理得乾淨，自家製醬汁夠香辣醒胃，幾乎每枱必點。泰式串燒加埋花生醬，又係香口惹味之選。呢度嘅甜品都好受歡迎，除咗芒果糯米飯，建議試試泰式拼盤，一碟有齊椰汁糕、千層糕及馬豆糕等糕點，最啱多心嘅女士喇。
圖：第7位 叁薯 (*新上榜)
呢間喺旺角出晒名嘅米芝蓮薯仔專門店，最近開到去尖沙咀，分店位於食肆林立嘅厚福街，仲有少量座位可以堂食，方便過旺角店！最多人食嘅重量級芝士焗薯，佈滿半溶芝士同酸忌廉，質感軟滑綿密似薯蓉，連薯皮都可以吞埋落肚！仲有好多小食好似炸薯角、流水芝士薯波同七彩爆谷雞粒都非常香口架。
圖：第6位 スーパー丼 (*新上榜)
正當海鮮丼嘅熱潮慢慢冷卻，但又有新店繼續開，呢間丼專門店環境與眾不同，簡潔門面似café 多啲！刺身丼同熟食丼各有8款，招牌北海道海鮮丼有齊大拖羅、油甘魚、海膽、帆立貝、三文魚子同蟹腳，刺身由築地直送夠新鮮。熟食可以試試北海道玉子黑松露和牛丼，用日本生雞蛋，和牛入口更加滑溜。
圖：第5位 辦館 (*新上榜)
原本開喺上環半山嘅咖啡店，最近喺中環同一個髮型用品店合作，有髮型師在場幫你set頭！分店裝修似足茶餐廳水吧，寫明「水滾茶靚」，充滿港式懷舊風情。咖啡推介Rose Latte，有淡淡玫瑰花香，亦有少少玫瑰花瓣，賣相靚。呢度仲有一系列嘅特式多士，好似黑松露芝士多士、火腿溫泉蛋芝士多士、棉花糖多士等。
圖：第4位 Sister Korea Café (*新上榜)
大圍店人氣高企，曾經上過每月十大，新分店開喺長沙灣，而且好近地鐵站，更加方便！舖頭有大量oppa駐場，裝修又夠young，最啱一大班fd子聚腳！雖然冇韓燒，但有其他韓式地道菜式食好似部隊鍋、芝士排骨等，必吃飛機醬缸醃蟹，有專人拆蟹再同麻油紫菜飯撈勻一齊食，蟹膏甘香鮮甜，生蟹肉滑溜，每日限量供應架。
圖：第3位 養心殿台式養生鍋 (*新上榜)
打邊爐都有得養生？冇錯，呢間被稱為「港版無老鍋」嘅台式火鍋，以養生為主題，好似寧神養心鍋湯底加咗川芎、白芷、天麻同當歸等藥材熬4個鐘而成，味道有淡淡藥材香，可以先飲湯先至再落配料打邊爐，其他款式如人參雞、麻辣同薑母鴨湯都好受歡迎。配料都有特色，同台灣一樣有凍豆腐同鴨血，充滿台式風味。
圖：第2位 L’attitude (*新上榜)
餐廳入面有大量得意影相位，好似白兔同熊人公仔、白雲等，無論係少女定係小朋友都一定開心！餐牌選擇豐富，菜式以多國嘅café菜式為主，食物加入咗大熱嘅元素，好似蟹膏帶子海膽拌飯、海膽蟹肉牛油梨芒果他他都係招牌菜，棉花糖雪糕仲有可愛造型，價錢合理而且服務唔錯，抵佢成為今個月嘅第二位！
圖：第一位 鯛魚湯專門店
本來開喺鰂魚涌嘅小店殺入灣仔，立即成為每月十大嘅第一位！鯛魚湯花好多時間熬製，3公斤只可以做到8碗，湯底帶奶白色而且魚味濃郁，配飯或者烏冬亦得。限量發售嘅皇帝蟹腳海膽鯛魚湯飯，甘香鮮甜，上枱時用火爐保溫保持熱辣辣。其他配料仲有鮑魚、花膠、魚肚及廣島蠔等，好有特色，唔怪得咁受歡迎啦！
圖：文：Perrins