生煎包看似普通，但其實要做得好都唔容易。一咬入口時充滿肉汁同肉香，包底酥脆，又有人鍾意厚皮，亦有人鍾情薄皮，你會鍾意邊款呢？今期介紹幾間人氣生煎包畀大家，一定有一間啱你心水！
米芝蓮街頭小食 麥記美食
圖：主要供應鍋貼、生煎包同酸辣湯麵等上海美食，曾多年獲得米芝蓮街頭小食推介，上年老闆喺同區開埋堂食店，讓大家可以舒舒服服咁食～佢哋嘅生煎包堅持每日人手搓製，加咗老麵落麵糰，令包體更加香。加上即叫即煎，包嘅上半部鬆軟，底部香脆，入口肉質鮮嫩爆汁，一份3個只係$12，超抵食！
手工爆汁生煎包 賀苗記包點
圖：元朗區內家庭式經營嘅包點小店，開咗幾年已經小有人氣～食物款式貴精不貴多，只賣4款點心，包括生煎包、鍋貼、菜肉包同蔥花卷。招牌手工爆汁生煎包以傳統生鐵鍋半蒸半煎製成，包底超香脆之餘，爆汁亦係佢嘅賣點！餡料選用新鮮豬肉同香蔥，湯汁超多帶有酒香，出色呀！不過因為逐底煎嘅關係，賣晒一底就要等下一輪，確保每一份都新鮮熱辣辣。
人氣生煎包專門店 祥興記上海生煎包 
圖：IdaC
人氣連鎖生煎包專門店，佢哋嘅生煎包一樣會爆汁，同傳統唔同嘅係佢哋嘅皮比較薄，食用時建議喺頂部咬一小口再食呀。另外仲有多款口味，包括原味、鮮蝦、黑松露、麻辣同黃金蟹粉；當中幾推介黑松露味，未食已經聞到黑松露香氣，入口同時感受到肉汁鮮甜同黑松露味道，有啲驚喜。
筲箕灣抵食生煎包 包包餃店
圖：Belle.
筲箕灣一間性價比幾高嘅上海小食店，店主有8年製作上海包點經驗，質量有水準，難怪長期都咁受歡迎。招牌脆皮生煎包包體軟糯有咬口，底部微脆，豬肉餡料就肥瘦適中，麵包比例似返傳統做法，肉細細一粒，湯汁則浸滿成個包，$4隻好抵食啊～
文：Yanica
編：Cathy
