「一盅兩件」係香港傳統飲食文化，蟹籽燒賣、蝦餃皇、豉汁蒸鳳爪等都係大家喺點心紙常見、耳熟能詳嘅名～有人忠於傳統，亦有人擅於創新，香港近年嚟都有唔少餐廳主打創意點心，將各種創意加入傳統點心中，如龍蝦汁墨魚燒賣、酸菜魚鳳眼餃同金沙脆皮腸粉等，味道比想像中更驚喜，更易打入年輕人巿場。今次介紹4間新派點心店畀大家，睇下邊間勾起到你興趣？
全新點心品牌 龍點心
圖: 以「匠心手藝，傳承創新」為品牌理念，希望保留舊滋味同時能搞搞新意思，令食客品味到創新點心嘅風味。所有點心嘅配搭喺坊間都好少見到，如龍蝦汁墨魚燒賣，上層加入彈牙墨魚膠，底層係流心龍蝦汁，好鮮味！酸菜魚鳳眼餃都好有特色，將酸菜魚肉加入餃子中，好似真係食緊酸菜魚咁～因為餐廳創意點心種類實在太多，所以都好貼心咁推出「一籠大滿足」及「龍點心」等拼盤，前者一籠有齊蟹粉菠菜香蝦餃、酸菜魚鳳眼餃、松露野菌晶瑩餃、筍尖蝦餃皇、碗豆桃子及臘味糯米燒賣，咁就可以每款試一件喇。
親民人氣點心 點心到 
圖: KivaLi
佐敦超人氣嘅點心專門店，成日都大排長龍㗎～除咗普通點心，都有唔少創意點心供應，價錢仲幾抵食！推薦金沙脆皮銀羅腸，滑溜嘅腸粉皮包住炸金絲網同蘿蔔絲，口感好豐富。食榴槤嘅朋友一定要試埋人氣點心榴槤雪媚娘，其實就係糯米糍，一咬落去大大啖榴槤，皮做得夠薄身同煙韌，加埋cream冇得輸！
招牌酥皮叉燒包 恆之茶居
圖: kimooooooman
港式點心茶居，請嚟點心名廚甘志遠師傳主理，一定要試當然係招牌甘哥叉燒餐包，就咁睇有啲似迷你墨西哥包，但其實上面係菠蘿包酥皮，薄薄一層但相當酥脆，攞上手完全唔油膩。叉燒餡肥瘦適中，味道鹹甜平衡，同外層嘅酥皮一齊食更香口。海膽燒賣選用新鮮日本馬糞海膽，適當嘅份量就可以帶起燒賣嘅鮮味～
千島醬蘿蔔糕 得閒飲茶
圖: sleepbeauty
呢間餐廳主打傳統同特色創意點心，全部即叫即蒸。用心製作，價錢又平民化～如春風得意腸，用傳統腸粉皮包住脆米網、蝦、粟米 、粒粒蟹子， 口感脆卜卜，有啲似日式炸蝦卷；千島醬脆皮蘿蔔糕更令人驚喜，外層口感香脆，粉唔會過厚，配埋千島醬同柴魚又有日式章魚小丸子嘅感覺。另外雖然蝦餃唔係創意點心，但係佢哋嘅生招牌又名得獎蝦餃之王，皮厚薄適中帶煙韌，蝦肉好彈牙，難怪個個都要食。
文: Yanica
