好想去日本食勻Omakase、備長炭串燒、天婦羅等美食兼嘆清酒？雖然暫時飛唔到，但荃灣呢間新開嘅餐廳就可以滿足以上願望！餐廳佔地12,000平方呎，分為多個區域。而且定價親民，Omakase最平$380就食到，鐵板燒套餐都係$360起。
 

Ikigai Concepts取名靈感嚟自日本嘅人生哲學「生き甲斐」（音：Ikigai、意：生活的意義），希望透過提供多元化嘅日式料理，畀大家細味生活當中嘅小確幸。餐廳裝修由日本著名設計公司「乃村工藝村」主理，融合日本嘅極簡主義，營造簡潔溫馨嘅環境。
 

廚師發辦專區

午市廚師發辦套餐（$380起/位）

新店嘅Omakase有多個組合，由午市最平嘅壽司12貫$380/位，到晚市最貴嘅生Iki Set $1580/位都有，豐儉由人。大廚會為客人精心挑選日本嘅時令海鮮，例如而家開始入秋，當然唔少得代表食材秋刀魚！仲有機會食到喜知次、牡丹海老、鮫鰈、左口魚等。壽司特別選用日本新潟縣魚沼米，口感飽滿Q軟。
 

秋刀魚

時令壽司（秋刀魚、北海道鰤魚、北海道紫海膽、日本拖羅）

午市廚師發辦套餐包括前菜、茶碗蒸、壽司12或15貫、湯及甜品。以淺木為主調嘅吧枱感覺典雅舒適，坐喺席前就可以一邊品嘗美食，一邊欣賞廚師手藝。
 

炭火燒專區

日本備長炭爐

香草黑豚肉（$38）、泡菜車厘茄煙肉卷（$35）、北海道芝士豚肉卷（$35）、虎海老腩肉紫蘇卷（$45）、明太子魷魚（$38）

串燒用日本備長炭燒製，高溫可以鎖住食材水分，油煙少同時又有獨特炭香。除咗一般串燒，呢度嘅廚師嘅特別設計一系列創意配搭，例如泡菜配煙肉、豚肉包北海道芝士等等。特別推介明太子魷魚，燒過嘅魷魚香氣十足，加上微辣嘅明太子提鮮，非常惹味。
 

蟹醬芝士玉子燒（$28）

另一推介係蟹醬芝士玉子燒，玉子燒外層燒至微脆，裡面保持軟嫩多汁，加上蟹醬同芝士增加味道層次。
 

雞肝醬配多士（$88）
 

 
和食專區

牛油果吞拿魚他他配魚子醬（$228）

和食專區嘅選擇最為豐富，從前菜、刺身、天婦羅、丼飯等一應俱全。例如呢道創意料理，用兩層吞拿魚他他夾住牛油果，上面更以魚子醬及金箔點綴，啖啖鮮味。
 

特上刺身御膳（$280）

新鮮刺身從日本空運到港，包括時令嘅北海道帶子等等。呢份特上刺身御膳就可以一次過食到多款刺身，搭配前菜、茶碗蒸、沙律等，非常豐富。
 

IKG卷（$280）

極上雜錦天婦羅（$268）

 
酒吧區

自助清酒售賣機Sake Z

餐廳特別引入自助清酒售賣機，只要用手機Scan去到指定網站，就可以睇晒近30款清酒嘅詳細資料，包括風味、建議配搭、人氣排名等等，總有一款係你嘅Perfect Match！
 

用Token就可以買到清酒，細細杯試啱再買。鍾意清酒嘅朋友亦可以留意餐廳不定期舉辦嘅清酒工作坊。
 

鐵板燒專區 - 預料10月中旬登場

Ikigai Concepts
地址：荃灣大河道98號如心廣場二期2樓211號舖

文：Cathy.H
相：Cathy.H、餐廳提供