近年愈嚟愈多甜品店將芋泥升級做主角，今次就整合咗一系列本地人氣芋泥甜品推介，畀一眾芋泥控慢慢發掘心水口味，一齊沉醉喺紫色嘅甜蜜世界入面～
芋泥甜品專門店 糖町芋泥甜品
圖：專攻芋泥主題嘅甜品店唔多，呢間就係其中一間以芋泥做主角嘅甜品小店，性價比高，芋泥分量一啲都唔手緊，難怪唔少人專登走去土瓜灣朝聖。必試之選包括芋泥麻薯腦袋杯，芋泥香濃綿滑，加上煙韌麻糬同滑嘟嘟奶凍，一杯入面層次分明，芋香同口感滿分。鍾意豆乳嘅朋友可以試埋芋泥豆乳蛋撻，撻皮酥脆、芋泥細滑，再加埋豆乳香，甜度啱啱好。另外仲有人氣芋泥撈芋圓杯，粒粒Q彈芋圓同香濃芋泥一齊食落口感好豐富；而芋泥抹茶奶凍腦袋杯就一次過滿足抹茶控+芋泥控，清新抹茶香同香甜芋泥融合得好自然～
無冰芋泥鮮奶 好吃吃光
圖：大角咀呢間台式小店嘅無冰芋泥鮮奶成杯超大份，芋泥直接佔咗3/4杯，認真誇張！入口綿密滑順，但又保留少少芋頭顆粒感，飲落去唔會齋滑無口感，啱晒芋泥控。最大賣點係冇冰但夠凍，飲到尾都唔會變淡，加埋用上日本牛乳，奶味香濃得嚟唔搶味。芋泥本身冇額外加糖，啱晒怕甜又想飲得過癮嘅朋友仔。午市加$20就有得升級加配，飽肚又滿足，CP值爆燈！
芋泥鮮奶桃膠小丸子 你好椰
圖：AMJL
以椰子甜品為主打嘅糖水店，近年大受歡迎，而佢哋招牌甜品就係芋泥鮮奶桃膠小丸子，糖水一上枱已經見到爆滿芋泥+滿瀉桃膠，小丸子分量都毫不吝嗇，粒粒煙靭，成碗糖水香甜適中，唔會死甜或者過膩。芋泥綿滑有層次，食落非常飽肚，甚至有朋友話可以當一餐食都夠！如果想試飲品，可以揀紫薯芋泥西米露，用料同樣豪邁，芋泥香濃，紫薯味天然，飲落清爽唔膩，甜度啱啱好，簡直一流！
芋泥麻糬包 Hashtag B
圖：呢間以千層蛋撻聞名，但其實佢哋嘅麵包都好受歡迎㗎～芋泥麻糬包造型走花花路線，打卡度十足，內餡用上台灣大甲芋泥，香甜綿密、質地細滑，甜得幾自然；入面仲加咗勁多麻糬，煙韌軟糯又有拉絲效果，咬落去麵包鬆軟，而且成口都係爆餡芋泥同麻糬，非常過癮。
文：Yanica
編：Cathy
