2月嘅十強餐廳大多有個共同點，就係餐廳嘅裝修設計通常都係充滿玩味，啱打卡之餘食物嘅配搭亦為大家帶嚟新鮮感。
第10位 ZipZip（*新上榜）
圖：上到去可能會有一種熟悉嘅感覺，因為餐廳前身都係同樣充滿玩味。改名重開後，裝修同Menu繼續帶有舊店嘅影子，但都有啲新嘢。用開心醬嚟整意粉都幾特別，仲有開心果碎添，可以揀配青口或者波特茄；而油炸鬼亦有新食法，點班蘭醬同煉奶都夾架喎原來。
第9位 壹.01 
圖：位於觀塘嘅台式料理小店，由幾位廿零歲嘅青年主理。鍾意食芋泥嘅朋友仔嚟到唔好錯過幾款芋泥小食同飲品，全部都好足料，保證滿足。炸鮮奶卷+古早芋泥三文治，前者外脆內流心，後者滿餡，仲有邪惡蛋之戀，即係芋泥肉鬆脆皮蛋餅，同樣香口。
第8位 二世祖（*新上榜）
圖：大角咀呢間café小店開咗幾年，但依舊人氣旺盛，牆上有趣嘅油畫同有水準嘅食物配搭，都係使之受歡迎嘅原因。芥末洋蔥醬炸雞窩夫係推介之一，炸雞、窩夫上面仲要加多隻太陽蛋，淋埋楓糖漿食，成件事就係邪惡但好食，炸雞夠脆，雞肉juicy，窩夫都脆，鹹中帶甜。另外推介只限堂食嘅特濃宇治抹茶白朱古力奶，茶味濃郁帶回甘，奶香十足，即使有白朱古力都唔會太甜。
第7位 Yuyu Sushi（*新上榜）
圖：長沙灣商場內嘅一間日式料理，除咗壽司外亦有串燒同烏冬等菜式，食材都係由日本直運。刺身、壽司都好新鮮，講緊嘅唔止係質素嘅新鮮，仲有款式都好新鮮。例如店長推介之一嘅法國鵝肝壽司同岩蠔壽司就真係坊間比較少見。前者煎至外脆內軟，味道濃郁；後者蠔肉飽滿，充滿鮮香。
第6位 Oink Square Coffee & Crêpe（*新上榜）
圖：之前以爆餡三文治打響名堂嘅佐敦外賣小店，前排新增埋crepes同croffle，全部都係即叫即製。開心果控可以揀雙重開心果crepes又得，揀開心果控牛角包窩夫都得，當然why not both吖？兩者都有真‧開心果碎同開心果醬，夠晒香。crepe餅皮軟熟，啖啖蛋香，croffle都係脆身。甜魔就推介可試Lotus Crème Croffle，焦糖醬加焦糖餅呢科科。
第5位 不籽是咖啡
圖：想放鬆chill下嘅嚟呢間café就最啱，空間感十足，室內室外都坐得，木系嘅設計好啱打卡。基本上嚟親都必嗌龍蝦湯配牛油果大蝦稻庭烏冬，龍蝦湯濃郁鮮香，烏冬同紫菜都索晒啲湯，好入味，配埋牛油果、大蝦同沙律菜等，豐富到一個點。特色飲品都唔少，其中一款係中式桂花配latte，陣陣花香架。
第4位 天心（*新上榜）
圖：喺開業冇耐就可以打入十強榜，當然有其過人之處。呢間餐廳日頭供應拉麵，夜晚則變成日式火鍋，最重要係拉麵同火鍋嘅湯底都係坊間少見。最有號召力嘅一定係鮟鱇魚肝鍋同廣島蠔香檳鍋，前者湯底由日本製造直送，淥熟食物後再沾埋新鮮鮟鱇魚肝一齊食，夠晒濃郁；後者則有大大隻飽滿甘香嘅廣島蠔，鮮甜爽口，重點係倒埋香檳入鍋，令鮮味再提升。
第3位 鬼混（*新上榜）
圖：又一間裝修充滿玩味嘅打卡西餐，室外都好好feel，十足個歐陸花園咁。近乎枱枱都會叫龍蝦沾麵。龍蝦去殼，啖啖肉食得又爽又方便，醬汁濃稠，粗身麵條掛湯力高，啖啖鮮味。抹茶羊架亦係一個大膽又特別嘅配搭，值得一試。
第2位 2派克雞排（*新上榜）
圖：本身喺台灣已有超高人氣，嚟咗香港冇耐就極速上榜，可想而之粉絲族群有幾咁強大，行過都成日見到條長長嘅人龍，但佢哋嘅雞排實在太香，好易就吸引咗大家去排隊。脆皮無骨雞排係最受歡迎嘅產品，size都幾巨，分分鐘大過你塊面，外皮炸得酥脆，但仍然keep到肉汁。有幾款調味粉可選，包括椒鹽、海苔、芝士、麻辣等，任君選擇。
第1位 牧羊少年與他的浮萍（*新上榜）
圖：榜首呢間可以話係文青集中地，餐廳結合餐飲、酒吧、文藝三大概念於一身，店內設有書架，食客可以揀返本書嚟睇都得。推介明太子康提芝士蟹肉墨西哥夾餅，餡多，最突出嘅係明太子同芝士，夠鹹香，同時都食到蟹肉嘅鮮味。主菜建議可選海膽黑魚子醬蟹肉貝殼粉，海膽醬勁rich啊，面層仲有有黑魚子醬，鍾意濃厚鮮味嘅朋友仔啱晒。
文：Kar
