新年過後，餐廳終於可以有限度咁重開晚巿，大家都即刻約返朋友仔出嚟見個面食餐飯，唔少人氣餐廳嘅門口又重新有返人龍喇。可能大家都太耐冇見，2月上榜嘅餐廳，大部分都係好啱朋友仔聚會同打卡嘅咖啡小店，有幾間更係人氣餐廳嘅分店或副線呢。
第10位 Will's Coffee （*新上榜）
圖：上年開咗好多間咖啡小店，呢間就係其中一間。Menu嘅選擇唔算好多，但就全部都係潮流人氣大熱，例如好似文青feel嘅bagel咁，仲會加入新鮮紅菜頭汁製成粉紅色bagel，就更易呃lilke了。日式鰻魚滑蛋貝果漢堡淨係賣相都夠吸引；另外仲有西多士又加入芋泥，綿密鬆軟又爆餡，大受歡迎，難怪可以脫穎而出打入十大。
第9位 福岡漢堡扒（*新上榜）
圖：嚟自韓國嘅呢間餐廳，主打石燒和牛漢堡扒， 選用100%澳洲和牛，自己漢堡自己燒，燒到外脆內嫩又有肉汁就最perfect池。菠蘿鮮鮮甜甜，揀菠蘿煙肉和牛漢堡扒就可以中和一下牛嘅膩感。除咗一系列嘅漢堡扒外，亦有牛丼選擇。東武里牛丼飯面鋪滿粒粒方形牛肉粒，仲有隻流心蛋，撈勻蛋漿食先係王道呢。
第8位 牧羊少年咖啡館（*新上榜） 
圖：有多間分店嘅牧羊少年，上年12月先至首次喺銅鑼灣開設港島嘅分店，咁快就打入十強，睇嚟港島嘅朋友仔真係期待咗好耐。銅鑼灣呢間店嘅feel同其他分店唔同，主要走灰白型格路線，另有多款新出美食，例如金沙鹹蛋黃鳳尾蝦，蝦肉彈牙、啖啖鹹香；素食朋友仔亦被細心照顧，素雜菜薄餅就用咗多款新鮮蔬菜，包括我們小蕃茄、香菇、西蘭花、芝士等製作，輕盈健康。
第7位 Seoulmate（*新上榜）
圖：打卡熱店去咗將軍澳開分店之後，亦迅速上榜。最cute cute一定係雲朵炒飯啦，雲朵用蛋白製，入口即溶。入面包住燒汁炒飯同蛋黃，食落仲甜甜地添。甜品依然係必須嘅，推介甜魔試朱古力烤自家製棉花糖，口感軟滑，厚厚嘅棉花糖慢慢喺口入面溶化，好rich好甜嘅感覺。
第6位 Lagom Kaffe（*新上榜） 
圖：呢間係旺角人氣餐廳嘅姊妹店，設有室內同室外嘅用餐位置，空間感大。主力提供三文治、沙律、意粉麵食同蛋糕等。推介奶油花雕酒燉雞意粉，啲意粉掛湯力唔錯，索晒啲湯汁好入味，不過酒味就唔算好重，有微微酒香食得出。巴斯克芝士蛋糕都有幾款，抹茶控就梗係要揀抹茶款啦，香濃軟滑，不過想食蛋糕嘅就要早少少去喇，好快就賣晒。
第5位 翔壽司（*新上榜）
圖：連廚師發辦都有得做takeaway嘅，抵佢哋入十強嘅。餐廳主打刺身，壽司，丼飯，全部食材都相當新鮮。北海道牡丹蝦夠晒鮮甜，赤貝爽口，仲有清酒煮鮮鮑魚、北海道海膽等，款款吸引。師傅仲好貼心咁如果係外賣嘅，紫菜會另上，返到屋企先自己包返，確保仲係有脆脆嘅口感。
第4位 角落（*新上榜） 
圖：以波希米亞風做主題嘅樓上咖啡店，自自然就會吸引到一班熱愛打卡嘅朋友仔去朝聖啦。食物方面仲要係主打素食同生酮飲食添，就連all day breakfast都有veggi版呢~~ 自問最注重飲食健康嘅朋友仔，不妨試佢哋嘅superbowl，一碗有齊羽衣甘藍、藜麥、烤紅菜頭、牛油果、西柚等，賣相又靚味道又清甜。
訂座優惠：全單85折
第3位 YAKINIKU KAKURA
圖：嚟自日本九州嘅燒肉店，由上月榜首位置微微跌至第三位。食材由日本直送，和牛係九州A5黑毛和牛，牛魔王一定識食啦~ 咩都想食啲就當然要求嗌和牛大判燒，要喜歡油脂香嘅朋友仔，推介牛胸腹肉同牛裏腹小排，兩者都好香呢。厚切牛舌則好juicy，肉味香。
第2位 Lucky Smash 
圖：漢堡有好多選擇，但要速食又要有質素嘅，非呢間莫屬喇。Burger Joys副線，本身已有一定嘅知名度，加上即叫即製嘅漢堡又多肉汁，當然可以繼續留守三甲位置啦。芝士控唔使諗，雙層芝士牛肉漢堡，樣樣材料都double，仲要爆晒汁，係滿足怠。不過食單層嘅一樣開心，芝士味冇咁濃時更可以食到牛肉香添。
餐飲券：64折 【人氣親民手打安格斯漢堡】 $28 Lucky Smash行運熱狗套餐
第1位 爆辣冷麵（*新上榜）
圖：呢間小食店，唔止爆辣，仲爆冷，竟然力壓群紅登榜首，相信可能同強大嘅芫荽黨都好有關係。事關佢哋樣樣料都爆多，爆多蟹籽冷麵真係堆滿蟹籽，由頭食到尾條條尾都會黏到好多蟹籽，唔使慳住慳住咁分配嚟食。至於爆荽蟹籽冷麵就更加大堆頭，一打開個盒全層都係綠色，喺辣香嘅冷麵中，多多重荽香，絕對滿足到一眾黨友。
文：Kar
