各位Bagel控有口福啦！台灣大熱嘅好丘貝果即日起喺銅鑼灣就買到，有11款唔同台灣特色口味任揀，而且有齊室溫同冷藏。唔知點揀好？睇開飯仔請品牌代表介紹啦！而市集其他台灣美食亦包羅萬有，唔好錯過機會呀。
 

貝果精選推介

好丘行銷公關經理Bella

city’super即日起至6月19號舉辦「台灣風味市集」，有睇到我地預告介紹就應該知道好丘貝果係當中最受觸目嘅一間Pop-up Store，喺台灣人氣高漲，單年就可以賣出100萬個貝果！今次台灣方面亦有派主廚團隊代表嚟香港。
 

開飯仔同代表之一Bella傾咗幾句，講到嚟香港開Pop-up係因為知道唔少香港人同台灣人一樣鍾意天然手工嘅食物。市集第一日下晝一點就已經賣完所有嘅室溫貝果，見到大家咁捧場佢地都會積極考慮同city’super合作再嚟香港！
 

地瓜乳酪（$32）

問到如果要推薦兩款口味比第一次食好丘貝果嘅朋友，Bella喺11款當中揀嘅第一款係地瓜乳酪，亦係台灣最受歡迎嘅口味之一，一個月就可以賣出2萬個。特點係口感Q軟，所以無論大朋友、小朋友定老友記食都咁啱啫。加上香甜嘅66號紅心地瓜非常有台灣特色，叮熱食芝士香味更濃郁喔！
 

草莓甜乳酪（$34）

第二款推薦嘅係草莓甜乳酪，因為台灣苗栗大湖嘅士多啤梨本來就非常出名，品牌選用新鮮草莓乾，加埋Cream Cheese味道酸甜又帶奶香，非常受小朋友同女士嘅歡迎。
 

柚子鳳梨（$32）

芋頭鹹蛋黃（$34）

而根據開飯仔嘅現場觀察，柚子鳳梨同芋頭鹹蛋黃呢兩款口味亦非常受歡迎。前者以新鮮鳳梨乾浸泡白酒增添酒香，再混入麵團，食到一粒粒鳳梨嘅甜同柚子嘅清香。後者選用苗栗嘅檳榔芋頭，自製綿密芋泥後加入手工鹹蛋黃，甚有台灣古早風味。
 

貝果口味全介紹

桂花紫薯（$32）- 富含花青素嘅台灣紫薯餡料，配以優雅嘅桂花香氣，口感較柔軟

橙香煎茶（$34）- 茶香麵團再加手作煎茶牛奶醬同蜜漬橘皮果丁，茶香同果甜平衡有致

大蒜乳酪（$32）- 麵團混入宜蘭三星蔥，而餡料就係台灣盛產嘅大蒜配Cream Cheese

辣椒九層塔香腸（$20）- 長條形Q彈貝果包住九層塔同煙燻法蘭克福德香腸，鹹香微辣

雙份起司（$34）- 使用Mozzarella同Cheddar兩款芝士，由外到內都富有雙重芝士香

（左）原味（$20）- 最能夠品嘗到單純嘅麥香，而且可以自己自由配搭唔同配料同醬料；（右）不知春（$23）- 不知春係烏龍茶嘅一種，特別將茶葉磨粉混入麵團當中，啖啖清香

其他台灣美食精選

咔蝦蝦 - 經典原味（$29）

咔啦蟹 - 經典椒鹽（$29）

江記華隆 - 杏仁豬肉紙（$165）

小拌麵 - 蒜香麻油麵線（$36）、古早味雙蔥油細麵（$36）、麻醬抹茶細麵（$36）

青鳥旅行 - 什錦蛋卷禮盒（$288）

city’super「台灣風味市集」日期
銅鑼灣時代廣場中庭：
即日起至2018年6月3日
時代廣場、海港城、IFC、新城市廣場、Lab Concept店：
2018年5月30日至6月19日

文、相、片：Cathy