又係時候同大家報榜喇。11月嘅十強餐廳入面，有兩三間都係火鍋店，睇嚟天氣開始轉涼，令到一眾邊爐友密密出動喇。而今次仲有成7間餐廳都係第一次新上榜㗎，甜品店、西餐廳、茶飲店等都有代表，百花齊放啊。
第十位 菓甜品（*新上榜）
甜品幾時都會食得落，呢間甜品一嚟開喺尖咀呢個旺區，地理方面絕對佔優，二嚟佢哋嘅甜品造型相當精緻，最啱就係打卡呃like。要入十強絕對唔難。就好似呢道「芝士栗一燒」咁，差唔多枱枱都嗌，像真度激高，香甜嘅粟米粒粒包住嘅係芝士蛋糕，味道同樣香濃。
圖：第九位 幸福班戟
一開業已經即刻登上上個月榜首位置嘅日本pancake店，今個月稍稍回落至第9位，但人氣依然高企。排長龍都要等食嘅pancake，鬆軟、帶啲啲空氣感，蛋香唔使講啦，蜂蜜牛油、焦糖醬都令佢嘅味道更加香甜，想試下特別口味嘅可以諗諗熱朱古力同奶茶味。
圖：第八位 發哥粥底海鮮火鍋（*新上榜）
呢間粥底火鍋新開冇耐，位於九龍灣工廈內，但日頭係冰室嚟，夜晚先做粥底火鍋。有唔少海鮮選擇，好似鮑魚、蟶子、龍蝦咁，幾新鮮，令到最後煲粥有好香濃嘅海鮮味，格外鮮甜。
圖：第七位 烤魚工房（*新上榜）
近年好多人都鍾意返深圳食酸菜魚或者烤魚，其實唔使上去，元朗呢間一樣好受歡迎，成日都要排隊。蒜香酸菜烤魚非常惹味，條魚幾新鮮嫩滑。鍾意食蒜嘅重味朋友，仲可以叫埋蒜蓉燒生蠔，夠晒香口。
圖：第六位 泰濃麵
上個月第7位嘅泰濃麵，今個月前進一位。由泰國廚師主理，湯底相當濃郁，而船麵嘅配料亦有返咁上下份量，即使以牛肉為主，都有美國肥牛、頂級安格斯牛同飛驒和牛揀。唔食牛食海鮮一樣咁開心，例如有原隻波士頓龍蝦海鮮船湯。
圖：第五位 一茶詞（*新上榜）
喺一堆珍珠奶茶圍攻中，呢間茶飲店能夠突圍而出打入十強，當然有佢過人之處。大家都係珍奶，但佢哋嘅珍奶就再加多咗少少功夫，少少變奏，變成火焰焦糖珍珠鮮奶。面層焦糖用火槍燒過，脆脆地，另外有杯烤棉花波波茶都好過癮。
圖： Victoria Y 、lamlamyuk
第四位 金鶴拉麵
由三甲微跌至第四位嘅拉麵店，主打雞白湯拉麵，湯底由日本製造直送，上枱前打入泡沫，幼滑清香。無論賣相定味道都有一定水準，難怪持續得到拉麵迷嘅歡心。
圖：第三位 寶哥火鍋味館（*新上榜）
打邊爐嘅季節，造就咗呢間佐敦嘅火鍋店新上榜就進佔三強嘅位置。喺度打邊爐，有ABC餐揀，都係不外乎刺身、和牛同海鮮，湯底仲有成12款選擇，三個鐘任飲任食，食物質素又唔錯，係值得試嘅。
圖：第二位 LIFETASTIC Patisserie（*新上榜）
甜品控嘅新寵兒，首推當然就係佢哋主打嘅澳洲西瓜蛋糕啦，杏仁碎餅、玫瑰忌廉、西瓜夾埋有五層，頂頭仲有士多啤梨同開心果碎，個樣靚仔之餘味道又香甜。另外法式焦糖燉蛋泡沫咖啡都好特別啊。
圖：第一位 豬手工房（*新上榜）
榜首係屬於大圍嘅一間工廈食店，但環境幾chill下，仲要有露天座位。招牌菜係外脆內軟嘅脆爆鹹豬手，真係卜卜脆㗎，鹹香肉滑，送埋杯菠蘿0%啤都幾爽。燒扇貝、燕麥紫薯餅同樣要試。
圖：文：Kar
