香港5大冷烏冬推介 特色冰鎮闊條烏冬、明太子蟹籽蝦冷烏冬
6天前

天氣愈嚟愈熱,好多人都想食啲清爽又少負擔嘅料理解解暑,今次就為大家精選5間有好味冷烏冬食嘅餐廳畀大家,幫自己降吓溫啦!


明太子蟹籽蝦冷烏冬 円相  

圖:lazyszemanamandaatang

主打高質日式料理,其中呢款明太子蟹籽蝦冷烏冬就最啱夏天消暑。用上煙韌彈牙嘅高質烏冬,口感絕對唔會粉粉哋,夠晒爽滑,烏冬上鋪滿粒粒分明嘅蟹籽,仲有三隻大蝦,蝦肉新鮮彈牙,口感豐富。明太子醬鹹香中帶點柚子清香,唔會過分creamy,食落有層次又開胃,加上微量洋蔥絲,令整體更加清新。


特色冰鎮闊條烏冬 WOWDON

圖:cowing

近期新晉人氣烏冬專門店,主打每日新鮮製麵嘅手工烏冬~招牌「冰鎮寬條烏冬配天婦羅拼盤」套餐絕對係夏日清爽之選,闊條烏冬外形似日本白布烏冬,質感煙靭之餘唔會太硬,最特別係配有三款醬汁,包括鰹魚汁、胡麻醬同咖喱汁,食法有啲似水冷麵。鰹魚汁最能帶出烏冬本身嘅麥香;胡麻醬則有粒粒芝麻質感,香甜夠味;咖喱汁就比較濃厚掛汁,偏甜但幾有特色。天婦羅拼盤包括炸蝦、冬菇、青椒同南瓜,炸粉唔會太厚,香脆不油膩。

 

雜錦天婦羅冷烏冬 稻庭養助  

圖:Simba

主打稻庭烏冬嘅專門店,人氣之選一定係呢款雜錦天婦羅冷烏冬,用上幼身扁條嘅稻庭烏冬,入口爽滑彈牙又涼爽,最啱夏天食。冷烏冬配埋特製醬汁,可以中和天婦羅嘅油膩感。天婦羅方面同樣誠意十足,包括炸蝦、帆立貝、獅子狗同蓮藕,炸漿薄脆,唔會搶咗食材原有嘅鮮味,而且擺得靚靚幾啱打卡。如果你平時對烏冬質感有要求,呢款幼身冷烏冬絕對會帶嚟驚喜!


麻藥溏心蛋手切牛腹肉冷烏冬 ZipZip  

圖:cyrus1818

主打多國fusion菜嘅樓上café,麻藥溏心蛋手切牛腹肉冷烏冬係店內大熱之選,用上煙韌嘅稻庭烏冬,加上吸飽鹹甜微辣嘅韓式麻藥醬汁。牛腹肉薄切但肉汁豐富,帶有嫩筋,牛味濃郁又唔韌,口感層次分明。另一亮點係溏心蛋,蛋黃流心,濃香黏口,混合烏冬一齊食更加滋味。重點係價格親民,炎炎夏日想食得有口感又唔膩,呢碗冷烏冬就啱晒你。


蟹黃冷烏龍麵 一起食堂

圖:xmelissalamx

主打日台fusion菜式,餐廳氣氛輕鬆親切,係夏日想搵啲清爽開胃食品嘅好選擇。蟹黃冷烏龍麵上鋪滿蟹黃同蟹肉絲,每啖都食到鮮甜海鮮味。烏冬口感煙韌唔會太軟,冰冰涼涼食落去非常消暑。如果想特別啲可以試吓加埋附送嘅醋,酸香中和蟹黃嘅鹹香,令整體層次更豐富。



文:Yanica
編:Cathy





關鍵字
日本菜
韓國菜
烏冬
咖啡店
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2025生日優惠餐飲精選 送多款免費餐點
2025-05-30
【2025新店精選】6月嘆現磨豆腐花/蝦濃湯拉麵/新派粵菜館
3天前
【專訪】灣仔身心靈主題Cafe 療癒師:呷茶探討4個人生階段
2025-05-15
飯局訂座優惠 精選特式西餐/印度菜/酒吧/粵式海鮮料理
2025-05-28
外賣自取精選優惠 環球美食多滋味
2025-05-21