蝴蝶酥香脆又重牛油香，無論係送禮定自己食都咁開心，一齊睇吓香港有邊間蝴蝶酥好食啦～

港式鹹蛋黃口味 Nina Patisserie

圖：餐廳（官網）

以精緻法式甜點作主打嘅餅店，蝴蝶酥係其代表作之一，深受本地食客歡迎。蝴蝶酥以薄脆鬆化聞名，每一片酥皮都層層分明，輕盈鬆脆，入口即化。製作過程中，廚師們以細膩嘅手法將牛油同麵粉融合，然後經過重重摺疊同焗製，令蝴蝶酥外脆內軟，帶有濃郁嘅牛油香氣；同時糖霜均勻地覆蓋喺酥皮上焗到金黃色，帶出焦糖嘅甜美氣息。口味方面有原味、黑白芝麻同黃金鹹蛋黃，連包裝都好有香港特色㗎。

長年人氣之選 帝苑餅店

圖：goeat818

可以話係蝴蝶酥界嘅名牌！唔少遊客嚟香港嘅必買手信～餐廳堅持使用新西蘭頂級小麥粉同牛油，每日由師傅手工鮮製，每一片蝴蝶酥都鬆脆香口，令人一試難忘。朱古力口味蝴蝶酥都好受歡迎，選用厄瓜多爾谷古粉同法國55%黑朱古力粒製作，擁有多達192層嘅酥皮，帶濃郁朱古力香氣。餐廳仲推出咗禮品裝，包括原味、朱古力、宇治抹茶同芝麻四款口味，精美嘅鐵盒設計，非常適合送禮。

稀少糖原味蝴蝶酥 Magpie Bakery

圖：siumaluk

如果你鍾意食蝴蝶酥又怕食得多會肥，一定唔可以錯過呢間出品嘅原味蝴蝶酥！用上高質嘅材料製作，包括日本雞蛋、法國牛油同稀少糖，相對健康啲又不失風味，仲要用低溫烘焙技術，減低反式脂肪嘅產生，令你食得安心啲！當你一打開盒，已經聞到濃郁嘅牛油香，口感鬆脆，保證每一啖都係最天然嘅味道。

多款特色口味 THE 24 . ST

圖：yungfoodietwins

一間以「四季」同「二十四節氣」為創作靈感嘅特色甜品店，有多款特色口味供應。佢哋堅持香港新鮮製造，而且無添加防腐劑。雜錦蝴蝶酥禮盒，一盒有5款口味：原味、蘋果山楂、三星蔥芝士、日本柚子香梨同日本黑豆芝麻，每一款都各具特色，滿足唔同味覺需求。蘋果山楂蝴蝶酥帶有蘋果嘅甜味同山楂嘅酸甜，清新之餘仲增加咗層次感。三星蔥芝士蝴蝶酥混合咗鵝油香蔥同淡淡嘅芝士味，鹹香嘅味道絕對係蝴蝶酥嘅新鮮體驗，令人難以忘懷。

文: Yanica