近年愈來愈多專門賣點心嘅小店冒起，唔再局限喺傳統酒樓，好多地方都可以輕輕鬆鬆嘆到靚點心，今次就同大家介紹幾間有特色同有水準嘅點心店～
本地手工點心．燉湯專門店 蒸廬 
圖：siuvia
呢間點心專門店細細間，但人氣極高，除咗沙田同荃灣，最近喺啟德開埋分店𠻹～主打即叫即蒸嘅點心同燉湯，最推介佢嘅蒸廬拼美點，有齊9款點心各一件，包括蝦餃、燒賣、叉燒包、粉果、馬拉糕、馬蹄糕等，款款都用料十足，而且一個人食都冇問題。籠仔荷葉蒸飯都係一大亮點，荷葉香氣滲透每粒飯，飯粒鬆化帶微微濕潤，充滿傳統風味。仲有自家燉湯系列都好滋補，難怪咁多捧場客啦！
必食酥炸奶皇包 新贊記點心皇
圖：ckk1912
以地道港式點心見稱，主打足料、大件兼有水準嘅傳統手工點心。蟹籽燒賣皇絕對係鎮店之寶。每粒燒賣都大大粒，面頭鋪滿蟹籽，手剁豬肉餡料則保留到扎實口感，仲食到蝦肉嘅鮮味；另一人氣之選就係蝦餃潮州粉果雙拼，一次過滿足兩個願望。蝦餃皮薄透光，內裡蝦肉爽口彈牙；潮州粉果餡料飽滿，食到花生、韭菜、豬肉等多重口感，夠晒豐富。而即叫即拉嘅腸粉滑溜有米香，配搭豉油一流。甜品必食酥炸奶皇包，將傳統炸饅頭升級，外皮炸到金黃香脆，內裡夾住香濃流沙餡，一咬落去，奶黃同鹹蛋黃嘅甘香即刻爆開，香甜又帶微鹹，層次分明！
抵食傳統點心 熱點點心專門店
圖：RaniP
以親民價格、用心製作嘅手工點心吸引唔少街坊同食客，提供多款傳統點心之外，仲有一啲少見又有創意嘅款式，好似千島醬香脆蘿蔔糕，炸到外脆內嫩嘅蘿蔔糕，加埋酸甜開胃嘅千島醬，再灑上木魚花，特色又好味。招牌雪山叉燒包都係必食，外層牛油酥皮微甜鬆脆，包身夠鬆軟，入面叉燒餡料飽滿，鹹甜交錯；燒賣皇同鮮蝦菜苗餃都係水準之作，蝦肉爽彈，皮薄餡靚。
真材實料點心店 鼎點 1968
圖：位於中環大館對面，價格以中環嚟講都算親民，所以吸引唔少街坊同上班族幫襯。蟹粉小籠包賣相精緻，皮薄餡靚，一咬開湯汁即時湧出，帶有濃郁蟹粉香，水準絕對唔輸畀大型酒樓。鵪鶉蛋燒賣亦值得一試，呢款懷舊點心喺坊間唔多見，鵪鶉蛋包裹喺燒賣中間，口感豐富，味道恰到好處。甜品方面，馬拉糕同流心奶黃包都唔錯，前者鬆軟濕潤，甜度適中，仲保持住剛蒸好嘅熱辣辣口感；後者奶香濃郁，輕輕一撕即有流心效果，係滿滿嘅幸福感。
文：Yanica
編：Cathy
