牛年到，各位牛魔王梗係要食返幾餐牛牛應下節。牛河、石燒牛、熟成牛、和牛燒肉等等，全部都係牛！希望大家喺牛年一飽口福～
和牛河粉 Spring field
牛河食唔少，但通常啲牛都係普通嘢，冇乜特別。呢間越菜館就唔同講法喇，主打越式牛肉河，湯底用和牛熬架！採用澳洲一間越南河粉老字號嘅配方，熬足16個鐘，牛味濃郁。而且選用高質食材，整出嚟嘅牛丸彈牙，牛肉片口感又嫩滑～牛魔王是咪蠢蠢欲動呢？
石燒牛 神
位於元朗嘅石燒牛小店，有牛柳、西冷、安格斯等唔同選擇，食客可以按自己喜好用提供嘅熱石燒牛扒。另外，佢哋設有自助區域，大家可以自己調校自己嘅醬汁，沙律菜、飯、湯同特色飲品全部任添。重點係雖然坊間食石燒牛嘅地方有好多，但好似呢間價錢咁親民嘅，就冇幾多間喇，78蚊就食到份哥士牛扒喇！
威靈頓牛排 牛屋餐廳酒吧
七十年代開業嘅街坊港式扒房，店內無論裝潢定係餐具都保留懷舊風味。食物性價比高，二百幾蚊就食到佢哋嘅招牌威靈頓牛排，外酥內嫩，牛肉充滿肉汁。
熟成牛 HENRY
圖：vanessafoodiary、christinafoodhunt
講起牛，梗係唔少得熟成牛啦，熟成過程將牛肉肉質變得更加軟嫩、多汁，而且風味更加集中，呢間氣派十足嘅酒店餐廳就提供利用熟成牛烹調嘅美國菜，精挑細選嘅乾式熟成牛肉配上自家製醬汁同手工製香腸，絕對係食肉獸不能錯過嘅高級享受～新年收到利是，咪豪返餐囉。
精品日式燒肉 燒肉石田屋
要食牛嘅，仲有燒肉揀！呢間係新開嘅日本神戶精品燒肉過江龍，主打日本進口嘅正宗日本和牛同兵庫縣嘅食材。有超過成15款A4同A5級別嘅日本和牛部位選擇，配埋自家製醬汁，同埋大熱日本清酒或者威士忌，牛控應該冇投訴。
文：Hailey
編：Kar