韓國呢間人氣麵包店Tardemah終於進駐尖沙咀新商場！店內主要供應各款超足料嘅鹹甜有機麵包，大部分材料由韓國直送，選用韓國有機麵粉，絕不含防腐劑。發酵完一日後加入熱湯種，令造出嚟嘅麵包更鬆軟。味道方面香港店每日約供應約十五款口味，會不定時更換。
艾草年糕方包
呢個可以話係香港店最人氣嘅產品，喺香港真係無咩機會食到！取用艾草取其顏色製成麵包皮，內餡加入韓國人至愛嘅年糕、栗子、紅豆、綠豆及野莓，食得返原材料嘅甜味及香味，仲有煙韌又甜甜地嘅年糕增加口感。
椰子蕃薯布莉歐方包
椰絲蕃薯方包可以話係開飯仔私心推薦！麵包黑色外皮使用少量墨汁製成，上層係椰絲酥皮，內餡係韓國蕃薯及忌廉芝士，椰絲及蕃薯帶甜，配上鹹鹹地嘅忌廉芝士簡直perfect match！
栗子忌廉芝士方包
鐘意食栗子嘅朋友唔好錯過呢個麵包。選用韓國公州栗子，係韓國最盛產栗子嘅地方，呢度嘅栗子帶有濃濃栗子香，雖然無咁甜，但質地比較軟腍，同鬆軟嘅麵包好夾。
更多【新店直擊】： |
南瓜忌廉芝士方包
選用韓國甜南瓜，南瓜香濃微甜，質感軟腍，加埋芝士既奶香，味道有啲似南瓜湯。南瓜包、栗子包同椰子蕃薯包都建議食前輕輕叮個30秒喔～
芝士蕃茄羅勒青醬包
對甜麵包無興趣嘅，呢度都有鹹嘅選擇。芝士蕃茄羅勒青醬包加入水牛芝士、蕃茄及橄欖等材料，味道同PIZZA相似，亦係香港店嘅招牌麵包之一！
拱佐諾拉蜜糖芝士方包
講到韓國，當然唔少得拉絲芝士啦～呢個麵包加入大量水牛芝士，食前放入微波爐叮一分鐘或放入焗爐三分鐘，就可以食到拉絲芝士啦。想味道再豐富啲，當然要點埋蜜糖食！
地址: 尖沙咀梳士巴利道18號Victoria Dockside K11 Musea B2樓223號舖
文：Yanica
相、片：Tom Li