銅鑼灣法國餐廳Seasons早前有新廚上場，德籍大廚Chef Lorenz曾於新加坡Robuchon工作。大廚坦言唔鍾意食tea，因為食物款式來來去去差唔多，於是設計呢款新tea set時，盡量給人驚喜元素，件件鹹甜點都做得精緻過人，而且選用時令食材，配合充滿初春感覺嘅三層架，耳目一新。
之前餐廳下午茶以木盒示人，今次換上三層架，用日本運來藤蔓裝飾，係真植物唔係膠製架。最震撼係上枱時，用水淋喺乾冰小盆栽上，營造煙霧瀰漫效果，煙霧帶有微微玫瑰花香，似仙氣飄逸，視覺嗅覺效果都一流。
架上有五款鹹點及提子鬆餅，味道及賣相比起平時tea set更精緻細膩。白露荀配奶凍及小番茄汁用時令白露荀，入口清新醒胃。青豆湯配洋葱醬有濃郁豆香，三文魚他他配黑珍珠魚蓉香滑，好fancy。
芝士蝦肉多士烘得香脆，而且餡料十足，開飯仔最欣賞鴨肝片洋葱餅乾，薄薄鴨肝滑溜甘香，食落又唔會太heavy。
更多飲食潮流： |
另外五款甜品就放於白色畫盤上，必吃榛子法式巴黎圈，將傳統甜點變成一個小泡芙，一咬就有軟心榛子醬，香甜軟滑。好似棒棒糖嘅白朱古力焦糖紅莓棒，薄薄白朱古力外層入面同樣有流心焦糖，配酸酸哋嘅紅莓好夾。
藍莓芝士蛋糕亦有濃郁果香，一口一件，唔會太甜太膩。經典綠茶杏仁餅同法式貝殼蛋糕亦出色，macaron做我得鬆化，貝殼蛋糕亦鬆軟富蛋香。
下午茶於12/4起每日供應，平日 $280/位、$540/兩位，周末 $298/位、$568/兩位。餐廳即將年搬遷，想食就要快喇。
地址：銅鑼灣恩平道28號利園二期3樓308-311號舖
文、相、片：Perrins