榴槤控注意！旺角呢間飲品店主打榴槤飲品，好似貓山王沙冰、榴槤奶蓋等等。除咗凍飲仲有熱食嘅榴槤小食，同無榴槤嘅水果茶、特飲等等，照顧各位重口味同鍾意清新口味嘅為食友。
 

花果山唔係西遊記嗰個，而係旺角廣華街呢間新開嘅小店，兩位負責人都好鍾意榴槤，所以想將榴槤帶入茶飲當中，諗下諗下仲加埋榴槤小食。其中一位曾任職於香港三星米芝蓮多國分子料理餐廳，及就讀於墨爾本法國藍帶廚師學院。
 

貓山王沙冰（$42）

貓山王沙冰選用馬來西亞貓山王榴槤果肉，先將40g果蓉放到杯底，再用80g貓山王果肉加牛奶等打成沙冰。難怪飲落榴槤味道濃郁，而且甜度控制得宜。口感細碎，有一絲絲榴槤果肉，飲得出真材實料。建議大家用吸管飲，因為果肉主要掛喺杯底，可以逐漸飲到榴槤果肉。
 

榴槤奶蓋炭焙鐵觀音（$35）

另外亦有榴槤奶蓋系列，奶蓋選用馬來西亞D24榴槤果蓉，飲落榴槤香味明顯，同樣有一絲絲榴槤果肉口感，而且帶少少回甘，如果可以再滑少少會更討好。配炭焙鐵觀音嘅茶甘，整體唔會太膩。
 

蝶豆花菠蘿特飲（$30）

除咗榴槤，呢度亦供應唔同嘅水果茶，例如呢杯蝶豆花菠蘿特飲就有漸層效果，賣相搶眼。打卡之後記得攪勻享用，味道以菠蘿甜香為主，Highlight位係有少少氣泡口感，而且加咗柚子果肉，令特飲口感同味道都更清新。
 

大樹菠蘿沙冰（$28）

用大樹菠蘿嚟整飲品可以話係香港少見，呢杯大樹菠蘿沙冰飲落又無想像中咁甜膩，反而係比較爽快嘅清甜。而且呢度嘅沙冰顆粒比較大，咬落細細碎碎咁幾得意。
 

 
 
西班牙油炸鬼（榴槤味）（$28）

小店亦有供應唔同榴槤小食，呢款西班牙油炸鬼Churros即叫即炸，口感外面香脆裡面軟綿。最緊要係要點埋店家自製嘅醬汁。榴槤醬用D24果蓉加煉奶等調配而成，聞落已經有榴槤香，食起嚟甜甜地同Churros又夾到。
 

（左）榴槤醬，（右）椰子醬

唔食榴槤嘅話亦有椰子醬選擇，裡面有椰絲、椰漿、白朱古力等，香甜得嚟嚟有一絲絲口感，味道就有啲似椰子糖。
 

榴槤煎堆（$28/3粒）

鄰近農曆新年，可以嚟呢度食返份榴槤煎堆，外面係加咗芝麻炸至金黃色煎堆脆皮，裡面就係D24榴槤果蓉。香口而且口感層次分明，榴槤香味唔算非常濃郁，可以當榴槤控入門小食。
 

花果山
地址：旺角廣華街1號仁安大廈地下24A舖

文、相、片：Cathy