想一秒到峇里島？觀塘呢間新開Cafe裝修以度假風為主，無論係室外嘅梳化、藤椅加上大量綠色植物、乾花拱門、室內嘅鳥巢吊椅同落地大玻璃窗，全部都好啱打卡又有熱帶風情。食物亦有水準，朝早點任何飲品加$18就有份豐富早餐！另一必點係以椰汁糯米飯製作嘅窩夫，煙韌得嚟又有玩味。
 

Be Leaf位於觀塘敬業街，係長沙灣Boholic嘅姐妹店，店名係比喻店主們希望營造一個好似「綠葉」咁慢活、休閒又舒適嘅空間畀客人。室外座位係寵物友善區，可以帶埋毛孩嚟一齊打卡。
 

Organic Tea - Earl Grey（$30）

Daily Breakfast Set（平日早餐時段惠顧任何飲品+$18）

早起嘅朋友有超值早餐食！日本有連鎖咖啡店點咖啡會送吐司，呢度就係早餐時段點飲品加$18就有早餐，而且仲豐富到好似迷你版All Day Breakfast咁！開飯仔採訪呢日就有生吐司、煙燻雞胸、松露炒蛋、沙律、乳酪。松露炒蛋嘅松露香氣濃郁，再滑啲就更好喇。煙燻雞肉調味適中，唔會太乾。
 

皇牌 be leaf 全日早餐（週末限定，$188）

想食豐富啲當然亦有全日早餐選擇，有齊焗蠔、炒蛋、牛角包、香腸、牛油果、煙三文魚、烤蕃茄、沙律。焗蠔外層香脆蠔肉肥美。烤番茄多汁酸甜特別醒胃，牛角包口感酥脆。
 

灸燒蕃茄芝士巴馬火腿酸種包（週末限定，$128）

呢份Open Toast就喺酸種麵包上面鋪滿巴馬火腿、水牛芝士、新鮮蕃茄，淋上青醬再加爆谷點綴。食落以巴馬火腿嘅鹹香同蕃茄嘅酸甜為主，再咬多幾啖就食得出芝士嘅奶香同青醬嘅香草味，無論口感定味道層次都好豐富。
 

糯夫（$88）

將椰漿糯米飯放落窩夫機熱壓，就做出呢份獨特嘅「糯夫」，配搭時令水果同椰汁雪糕。「糯夫」外層微微焦脆，裡面煙韌軟Q，仲咬到一粒粒糯米。芒果肉酸甜多汁，雪糕嘅椰汁香亦自然討喜，加埋炸綠豆仁，好似窩夫版嘅泰式芒果糯米飯啊！
 

楊枝甘露梳乎厘班戟（$128）

梳乎厘班戟用日本雞蛋、日本麵粉同北海道牛乳製作，相當蓬鬆有空氣感，入口即溶帶淡淡蛋香。班戟有多款口味，楊枝甘露呢款就係淋上芒果椰漿味嘅忌廉，再配搭芒果、柚子、西米，味道的確有還原到楊枝甘露，酸甜清爽，食完一份都唔會膩。
 

Be Leaf 
地址：觀塘敬業街55號皇廷廣場地下2號舖

文、相：Cathy.H