大家對葵興嘅印象不外乎都係工廈、商廈或者係住宅同學校，如果要搵食嘅話，基本上，應該數咗好多區都未數到落去。不過，最近有間悠閒系嘅café新開張，有多款心機菜式，仲有個「酒館corner」可以望住街景咁嘆紅白酒，都幾chill，成件事就唔同講法喇。
好日咖啡店以前喺銅鑼灣希雲街開店架，儲落咗唔少fans，大家特別對佢哋嘅burger留下深刻嘅印象，因為佢哋嘅醬料都係自家調配、配搭新鮮。爽瓜瓜熔岩手打牛肉芝士漢堡(配特調花生醬) 嘅花生味非常香濃，仲可以食到一粒粒嘅花生，增加口感之餘同漢堡亦好夾。塊漢堡扒係經改良過嘅自家手打牛肉2.0版，口感比舊店嘅更鬆軟同多汁。
另一款漢堡同樣吸睛，酥炸軟殼蟹鮮芒果莎莎漢堡，原隻軟殼蟹好酥脆，配埋酸酸甜甜嘅芒果醬，感覺唔會太膩。啲芒果醬仲用咗真‧芒果肉落去打出嚟，好有誠意。
新店當然要有新菜式，喺咁chill嘅café度享用egg benedict好啱數，除咗坊間常見嘅組合配搭外，推介大家可試羽衣甘藍沙律配蟹肉青瓜，蛋香中滲有啖啖嘅鮮香。
脆炸藕片配鮮製手工牛油果醬係一款會令人食唔停口嘅小食，蓮藕切到薄一薄再拎去炸，脆得嚟又唔油，用嚟送酒就perfect池。雖然就咁食都已經好香口，但千祈唔好漏咗點埋牛油果醬，餐廳特意加咗5、6種香料去調製，好清香。
黃昏或夜晚去嘅話，揀酒館corner坐就最有氣氛，想要杯紅酒或者cava又得，試下餐廳嘅特飲Rosemary Kiss都得。Langhe Doc Rosso Matot 葡萄酒用咗幾種葡萄去釀製，口感輕盈，仲有微微車厘子香味，配意粉、牛肉都幾夾；至於西班牙氣泡酒CAVA IYE – Brut則喺樽內進行二次發酵，花香味突出，配海鮮就最好。
女生對Rosemary Kiss總係情有獨鍾，陣陣花香同香草味，清爽微甜嘅感覺令人舒暢。
好日咖啡店
地址：葵涌葵昌路72-76號活@KCC8樓801號舖
文：Kar
相、片：Tom Li