周圍都係工廠嘅葵涌區，最近有個由工廈改裝而成嘅新商場，10層樓高，有啲銀座嘅feel，入面有成廿幾三十間餐廳，啱晒附近返工返學嘅朋友仔，以後食飯就多好多選擇喇。等開飯仔介紹其中幾間精選畀你哋啦。

靚靚日式甜品   瓜破菓子店

呢間由網店變成實體店嘅日式甜品店，已經開咗一段時間，不過最近又新增咗兩款甜品，都係用上唔同日本食材，砌到個樣靚靚der。抹茶控唔使問肯定要試「抹茶與酸味」，即係抹茶朱古力撻、抹茶jam、柚子mousse等，平時好少咁樣嘅配搭，原來甘甘澀澀嘅抹茶同酸酸咪咪嘅柚子都幾夾得埋。另一道朱古力甜品叫「魅」，中間心心係朱古力慕絲，仲有加到whisky去製作，好醇香。

台南風味   大公雞

主打台灣菜嘅餐廳，主廚亦曾喺台灣任職。lunch食碗紅燒牛肉麵應該幾滿足，淨係個湯底都用咗成48個鐘去熬㗎，有牛骨、蔬果、藥材等料，味道甘香，牛肉味亦夠濃郁。另外如果多一兩個人一齊些牙，可以試埋寶島鹽酥雞同埋台南拼盤。一個拼盤有齊牛腩、 牛筋、大腸、牛肚同滷蛋，好有台灣風味。

厚蛋牛治    SHY Xpress

由閃電傳真機伍文生哥哥開嘅舖頭，本身已經有幾間分店，都係以蛋牛治為招牌，嚟到呢個商場當然都唔例外啦，一份超級蛋牛治好足料，而且佢哋8點就開，係商場內比較早開嘅餐廳，方便大家可以買埋個早餐先返工。而鰻鰻燒蛋包飯就更加暫時係得呢間分店獨有咋。

雞脾薯條    南記冰室

如果想簡簡單單食餐茶記，呢間應該幾啱你。一般茶記食到嘅嘢呢度都有，仲要連車仔麵都有呀。不過要特別介紹嘅，係佢哋每日限量供應嘅焗飯同意粉，點解？因為係用個超厚多士盒裝住㗎，仲可以揀要鮮茄、肉醬、芝士等醬汁，甫推出已經好受客人歡迎。而如果可以等晏少少先食嘅就梗係要嚟食佢哋嘅茶餐啦，大大份炸雞脾薯條啊！皮脆肉嫩，好鬼吸引，最多食完跑返多幾個圈囉。

一雞幾味    咪走雞

雞，全部都係雞，食雞有零舍多種方法。好似呢度就有去骨砵仔咪走雞、重慶辣雞煲……前者淋上以沙薑、雞汁、香料等熬煮而成嘅秘製醬汁，原砵熱辣辣，卜卜泡泡咁上枱，送飯幾啱。另外仲有花膠雞湯米粉，湯底以鮮豬肉碎、豬潤、腐竹再配埋雞湯熬煮而成。

鮮榨果汁     Drink Something

時下興果汁、珍奶，呢個商場當然都會有返一兩間特飲店啦。呢間喺地下嘅小店，就主打鮮榨果汁同奶昔等，有官配組合，亦可以自選組合。懶得諗嘅朋友仔可以考慮要牛油果狂熱或者品紅。前者係牛油果加蘋果加檸檬，幾杰身幾飽肚，蘋果味較牛油果突出；而後者就係火龍果加奇異果加蘋果，成杯鮮粉紅色咁好鬼sharp，味道亦清甜。

文、相、片：Kar