夏天為大地帶嚟......芒果！踏入五月，又到咗芒果嘅當造期啦。今年除咗有食開嘅台灣愛文芒、日本太陽之子、菲律賓呂宋芒等選擇外，連柬埔寨白花芒都有！

 柬埔寨白花芒

由Fantastic Fruit果園引入香港嘅白花芒，喺離柬埔寨首都金邊大約20公里左右，一個由香港人投資嘅盆地度，以天然方法種植，由於地理位於內陸地區，同其他喺島國種嘅東南亞芒果比較，白花芒會溫和啲，冇咁濕熱，保存時間亦都耐啲，買咗返嚟室溫放一星期都可以。

白花芒果身圓潤，肉質厚而果核較薄，甜度甚高，用糖度計量度更加高達20度！柬埔寨當地人有種特別嘅食法，就係刨皮食！口感相對煙韌啲，可以食埋啲纖維，仲有陣陣白花香味添。每年11月到6月都係白花芒嘅盛產期，不過根據水果入口商Edward Lee講，今年柬埔寨雨季提早咗，白花芒嘅當造期都提早完，可能食多一兩星期就冇貨再入喇。

 台灣愛文芒

 日本太陽之子

不過芒果迷又唔使太失望嘅，緊接住就輪到㡳台灣愛文芒同日本太陽之子嘅盛產期啦，兩款芒果都係生長喺陽光充足嘅地方，其中太陽之子一年入面更有超過150日嘅時間係畀太陽照射到！經長期照射，個個芒果都係艷紅色，好靚。
愛文芒果肉軟滑，甜身多汁；太陽之子甜度甚高，又厚肉又多汁。

 泰國金水仙芒

至於供應最穩定嘅一定係泰國金水仙芒，一年四季都有，果肉厚實，香味亦好足夠。

白花芒供應點：
一田超巿、果欄等

文：Kar
相、片：Tom Li