近幾個月陸續有唔少café開業，傳統西式、日系同素食都有，多到去都去唔晒。大角嘴最近就新開一間同區少見啲嘅韓系咖啡店，負責人Tim因為本身對韓國飲食都好有興趣，所以就開咗呢間主打韓式fusion菜嘅餐廳喇！餐廳裝潢以白色簡約為主，牆身佈滿花花，啱晒鍾意韓風嘅朋友過嚟飲嘢食嘢兼相機食先。

卡邦尼炸雞、鹹蛋黃炸雞(半份/$98)

炸雞同坊間唔同嘅係，呢度特意選用歐洲原隻燒春雞，然後連埋骨一齊炸，會比較滑身同埋連多肉汁。推介有西式卡邦尼及港式鹹蛋黃口味，外皮炸得香脆，前者新鮮感較重同炸雞都幾夾；後者就較惹味充滿鹹香，醬汁加入兩至三粒鹹蛋黃及牛油等食材炒至起沙，經過調較後食多兩件都唔會膩。

卡邦尼煙肉泡菜意粉($72)

卡邦尼意粉大家就成日食，餐廳就加入韓國泡菜，味道香辣開胃，而且中和咗卡邦尼嘅膩感，意粉軟硬度適中。

韓式海鮮意粉($72)

嚐辣嘅朋友可以試吓韓式海鮮意粉，醬汁加入番茄肉、韓式辣椒膏及泡菜汁烹調，味道都幾辣吓，唔食得辣都可以叫小辣嘅～

粟米煙肉三重芝士pizza($108)

餐廳有唔少食材其實都係自家製，好似pizza餅皮，搓成粉團後放置於雪櫃自然發酵12小時，無加任何添加劑，食落就更香脆及鬆軟喇～三重芝士pizza加入粟米、煙肉以及忌廉芝士、mozzarella、車打芝士及巴馬臣芝士其四種芝士，「芝」味好香濃！

韓式烤牛肉漢堡配炸薯條($98)

偏向韓式口味嘅朋友呢個烤牛肉漢堡都啱你胃口，醬汁微微帶甜，一啖咬好滿足！漢堡包睇落比出面淺色，係因為麵包同樣係自然發酵，而且無蛋奶素，自然無咁heavy！

芒果奶油窩夫

窩夫粉漿亦係自行調製，特意做到無咁甜，加埋新鮮芒果粒及芒果醬，味道都好fresh～

另外餐廳有聘請特殊人士工作，包括一位聽障人士及自閉症人士，Tim話因為之前工作關係有接觸呢類人士，覺得佢地欠缺一個機會，而且普遍較勤力及好學，更願意去付出，經過訓練後佢地製作出嚟嘅食物同飲品同普通人無異，大家可以去支持吓。

My Ahjussi

地址: 大角咀大全街39號地舖

文: Yanica

相、片: Tom Li