又多間美國漢堡包店嚟到香港啦~ 話說佢哋喺全球包括喺意大利、比利時等歐洲、北美嘅地區已經有超過1500間分店，而香港呢間係全亞洲第一間分店呀威威豬~ 餐廳主打無添加嘅漢堡包同薯條，而且仲有成15款配料免費任加，就連汽水都係免費無限添飲啊。

佢哋同一般快餐店最大嘅分別，應該就係舖頭既冇冷藏櫃，亦冇微波爐，所有漢堡包同薯條都係每日新鮮即場炮製。客人可以根據自己嘅食量選擇要單層漢堡定雙層漢堡，要唔要芝士、煙肉，之後就免費任加配料啦。配料種類一共有15種，包括洋蔥、煎炒洋蔥、生菜、蕃茄、酸瓜、煎炒蘑菇、墨西哥辣椒、青椒、茄汁、芥末醬、蛋黃醬、酸瓜醬、牛扒醬、燒烤醬同辣醬。鍾意嘅話加晒15種配料都得架！當然，如果你有嚴重選擇困難症嘅話，你同店員講聲「All the way！」佢哋就會有個預設嘅官配漢堡畀你啦。

熱狗同樣都可以自選配料，值得一提嘅係，呢度嘅熱狗腸，係全牛肉腸嚟呀，不過就唔算話好濃味。

至於薯條嘅用料都相當講究。薯仔取自多個外國農場，舖頭裡面仲會有塊牌寫住當日嘅薯仔係嚟自邊度。啲薯條全部都係由人手切，喺100%花生油中炸兩次，厚切令薯條更有質感，保留薯皮亦令口感變得豐富，外韌內軟。薯條有兩種口味，一係就都頗重鹽味嘅five guys style，一係就微微香辣嘅cajun風味。

免費任加嘅除咗有漢堡配料之外，汽水都係可以無限refill，不過成30蚊一杯，都應該要斟返幾轉先抵喇。遲下仲會推出milkshake，包括朱古力、士多啤梨、花生醬等味，士多啤梨嗰隻仲係用新鮮士多啤梨打成架~ 呀，爭啲唔記得講，milkshake同樣可以免費任加10種配料，官方單張仲介紹話「試試添加煙肉到任何奶昔！」添~ 好奇心重者歡迎挑戰。

Btw，如果去到嗰陣要等位嘅話，可以喺門口位置食住花生先呀！呢個唔係gag嚟架，佢哋真係有大量花生放咗喺度，畀大家免費享用。舖頭負責人話，預計嚟緊會喺香港繼續開多10-15間分店，計劃下間可能喺九龍開喎，粉絲繼續期待吧。

Five Guys
地址：灣仔莊士敦道60號地舖
正式開業日期：11月19日

文、片：Kar
相：Cathy