無論你熱唔熱愛返工都好，象徵住「糧尾」嘅月底又嚟啦~今次開飯仔帶大家去新蒲崗搵食，工業區都一樣有好嘢食！
嗌餸食lunch 嫲嫲雲吞雞
呢間餐廳主打京、川、滬菜，午市提供嘅小菜亦都特別多，有成30款！啱晒同同事一齊happy share啦！而且包飯、包嘢飲，都唔使50蚊。可以試下佢哋嘅「銀芽鱔糊」，火候啱啱好，鱔魚食落好有口感，配埋芽菜撈飯就perfect啦！
60年代懷舊麵店 英記美點小食
圖﹕rollingpanda、Agnes The Foodie
睇舖頭門面就知佢哋走懷舊風啦！而嘢食都好有舊時嘅味道~例如南乳豬手、牛腩等，特別要試下「招牌巷仔雲吞」，大大粒手包雲吞，咬落蝦味十足！想邪惡啲就要試「六十年代撈麵」啦，用鮮榨豬油同豉油撈麵，real食得到60年代嘅feel呀 ~
抵食日式便當 又一間餐室
睇餐廳名可能以為又係一間茶記，非也；呢間餐廳主打日式便當，真係用一個日式竹製飯盒，配上擺得精緻嘅配菜。餐廳提供嘅便當有炭燒雞扒、三文魚西京燒、蒲燒鰻魚等，雖然唔係大大條，但勝在煮得入味！
size啱啱好 666泰船麵
擁有一個小鳥胃嘅女生們，今次唔嗌「少飯」都一定食得晒~皆因呢間餐廳主打泰式船麵，每碗麵都比較細碗（所以都比較平）。成碗麵嘅精華就喺個湯底啦，以唔同草藥熬製而成，飲落有淡淡嘅草藥味；再配上豬肉、牛肉、泰式扎肉等，務求做到好似喺泰國咁話。
平食越南菜 小巴黎越南豪威餐廳
新蒲崗唔多有越南嘢食，如果突然心癮起想食，嚟呢間餐廳就實冇錯。主打越式粉麵、小食等，有扎肉撈檬、香茅雞翼河等，30零蚊都有交易。而特別推介「生牛肉河」，牛肉大大塊，而且有足牛味，配上湯底嘅清甜，食落完全冇牛肉嘅油膩感呀~
文﹕Kiko