《米芝蓮指南香港澳門2018》於30/11揭盅，結果塵埃落定，指南一共收錄了227間香港餐廳及65間澳門餐廳，港澳版今年已經係第十版，十年來為本地飲食界製造唔少話題，今次一於來個米芝蓮總結。（延伸閱讀：結果完全版https://s.openrice.com/QrbcApn4000及新摘星餐廳介紹https://s.openrice.com/Qrbc0q14000）

《米芝蓮指南香港澳門2018》最新收錄一覽

每年發佈會都喺香港進行，今年首度移師澳門新濠天地舉辦，當日陣容都算鼎盛，傳媒、餐飲業界同大廚都有出席，場面都幾星光熠熠架。

今年封面設計一洗以往紅當當、以字體為主的形象，請來插畫師飛天豬操刀，畫上雞公碗及地道美食，感覺更年輕新潮，有新鮮感！

插畫師飛天豬為今年米芝蓮設計封面

不過整體結果驚喜欠奉，三星同二星都冇新面孔，三星名單更加係兩年冇變動，唔通米芝蓮評審覺得真係冇新餐廳可以一躍而上？一星名單有晉升、有搣星，不過睇真啲，Tate只係搬新地址，Kaiseki Den by Saotome只係改名及搬店，營致會館開業短短三個月就摘星，大廚蕭顯志師傅早於唐閣及都爹利會館已取得米芝蓮星，向來係奪星常客。

蕭顯志師傅稱本來以為餐廳只收錄於書中，只開業3、4個月就奪星坦言估唔到，努力得到回報所以心情興奮。

香港洲際酒店的Rech，為來自法國巴黎過江龍，曾獲米芝蓮一星推介，幕後主理人係法國殿堂級廚神Alain Ducasse，招牌菜大致跟總店一樣，來港獲星都相當合理。

淺水灣法國菜餐廳The Ocean，開業兩年，半年前rebrand後，以來自法國的法籍名廚Olivier Bellin之名登場，以Brittany的海鮮菜式作主打。首度在港摘星，副廚Jean-Michel Bardet表現興奮。

Jean-Michel Bardet稱開心到要開香檳慶祝，以後會繼續努力。

Kaiseki Den by Saotome師傅五月女広之稱有信心奪星，滿意今年結果，來年都會繼續努力爭取佳績。

御寶軒亦係來自新加坡飲食集團的高級粵菜，本店於去年獲一星，及連續多年獲得亞洲50最佳餐廳，上海分店於2016年更獲米芝蓮二星評價。

圖：Happinessbb

十年來長期穩佔米芝蓮三星，原來只係得一間，就係四季酒店嘅龍景軒！由第一次奪星到今年第十次，總廚陳恩德師傅功不可沒，水準保持穩定，相信以後想幫襯會更加困難。

圖：Sher_sher、fatlam0606

總廚Richard Ekkebus率領的Amber，亦係連續十年獲二星評價。呢間餐廳多次於全球最佳餐廳、亞洲50最佳餐廳榜上有名，質素超晒班。餐廳將於2018年7月閉門裝修，以全新概念及形象示人。

名廚Richard Ekkebus及Umberto Bombana

連續第二年獲一星的VEA大廚Vicky Cheng，亦評價今年結果好穩定。

Vicky Cheng及法國廚神Alain Ducasse合照

反觀以往曾出現的驚喜小店或港式餐廳，今年完全唔見，實在有啲失望呀，街頭小食多咗一間元朗小店、車仔麵同梳乎里班戟，叫做有返少少誠意。澳門更加係成張名單搬字過紙，完全零變動，甚至連車胎人都一模一樣！

慘被「搣星」餐廳包括名廚Bombana開設CIAK - In The Kitchen，大廚已過檔嘅駿景軒同Seasons及添好運點心專門店（北角）。添好運雖然於亞洲各地大展拳腳開分店，不過本地卻只剩低深水埗分店維持米芝蓮一星評價，希望培哥繼續努力呀。

更多米芝蓮相關資料：https://www.openrice.com/info/Michelin2018/index.html

文、相、片：Perrins