近月開幕、標榜港島最大型酒店之一嘅灣仔區新酒店，餐廳有酒店自己負責，亦有引入合作品牌，當中中菜廳、西餐廳、大堂酒吧同埋西餅店都由酒店營運，跟住開飯仔睇睇有咩特色啦～

當代粵菜 合和軒

裝潢以中國「廿四節氣」為題，優雅簡約風格帶嚟輕鬆嘅感覺。供應嘅當代粵菜有經典同創意組合，其中「合和軒片皮鴨（兩食）」選用北京櫻桃鴨，淨係吹氣上皮風乾就要12小時以上，先可以入爐烤製。片皮鴨所配搭嘅9款配料，包括山楂條、甜麵醬、京蔥等經典款式外，仲有桂花黃糖、泡野山椒、哈密瓜，味道更多元化。

片皮鴨（兩食）可配醬爆鮮淮山炆鴨件/鴨鬆生菜包（$788）

另外濃蝦湯蝦球野菌炆珍珠米則結合西式元素，以濃蝦湯煮珍珠米，帶點risotto嘅感覺，食落有咬口。而功夫菜不得不提浮萍菊花豆腐湯百合淮山，菊花豆腐切得幼細，絕對考師傅手藝。

浮萍菊花豆腐湯百合淮山（$148）、濃蝦湯蝦球野菌炆珍珠米（$268）、蜜汁叉燒（$198）

海鮮料理方面，焗釀蟹蓋特別加入牛油果，令蟹肉更加清新，口感更加滑。而荷香豆酥蒸斑柳魚肉爽彈；香煎金蠔鬆生菜盞則香口惹味。

荷香豆酥蒸斑柳（$348）、蟹肉牛油果焗釀蟹蓋（$248）、香煎金蠔鬆生菜盞（$248）

廚師推介海鮮菜

三文魚籽碧綠龍蝦粿（$108）、蘿蔔天鵝酥（$65）

抹茶糯米糍（$58）、雪蓮子銀耳燕窩燉萬壽果（$198）

合和軒
地址: 灣仔堅尼地道15號合和酒店20樓

自助餐+特色雞尾酒 Lobby Café / Lobby Bar

開放式廚房設計嘅西餐廳，主打半自助餐同週日早午自助餐，另外亦有套餐、無麩質食品照顧唔同類型食客。同場仲有Lobby Bar供應特色雞尾酒㖭。值得一提嘅係半自助晚餐，主菜特別設計「一味兩食」配搭，為食客打開新嘅體驗。例如揀烤焗頂級肉眼牛扒會配燴牛面頰肉，燒波士頓龍蝦則配烤焗龍蝦餅，前者更選用美國頂級肉眼扒做主菜，牛面頰肉就用上澳洲和牛慢火炆煮大約10小時，口感軟腍。

半自助晚餐主菜：燒波士頓龍蝦、烤焗頂級肉眼牛扒（均為$688/份）

龍蝦爽口彈牙

半自助午餐主菜：韓式醬煮牛肋骨、香煎三文魚柳（$138起）

呢度仲設有單點菜式，其中烤大蝦叻沙湯麵嘅湯底用上自家調配醬料：先炒香蝦乾、參巴醬、香茅、尖椒等二十多種香料，同時帶椰香味；加上燒大蝦、魷魚、兩款麵條等配料，鮮香惹味。

巴東牛肉、烤大蝦叻沙湯麵（均為$188/份）

大蝦燒得啱啱好

氣候主題飲品之中，El Niño（厄爾尼諾）以茉莉花茶味嘅Rum為基底，加入橘子、柚子、百香果、牛奶等，香氣獨特易入口。而Misty（霧） 則以Cold Brew威士忌為基調，混合楓糖漿同Chocolate bitters，味道較濃厚。

酒吧供應雞尾酒、無酒精雞尾酒等

雞尾酒：El Niño、Misty（均為$118/杯）

鍾意水果風味嘅朋友不妨試試Red skies（ 天紅），混合鳳梨、草莓、荔枝同梳打水，入口好清爽。

Red skies（$88/杯）

Lobby Café
地址: 灣仔堅尼地道15號合和酒店19樓
*試業期間由即日起至2025年2月28日（包括節慶日子），所有堂食套餐同自助餐可享食品85折優惠。

Lobby Bar
地址: 灣仔堅尼地道15號合和酒店19樓

精緻蛋糕、酥餅 Patisserie   

呢度嘅糕點有件裝亦有原個蛋糕選擇，如果你愛好咖啡同堅果就要試咖啡胡桃蛋糕喇，皆因師傅以此心頭好為靈感呀～咖啡豆萃取做成一層mousse，再用山核桃同咖啡豆製作praline醬，營造出流心效果，好有層次。另外朱古力柚子蛋糕巧妙地結合甜同酸嘅對比，以40%牛奶朱古力製作mousse，再用日本柚子製作柔軟內餡，食落唔會過甜。

咖啡胡桃蛋糕（$88/件）、紅桑子撻（$78/件）

朱古力柚子蛋糕、希臘乳酪芝士蛋糕（均為$78/件）

Patisserie  
地址: 灣仔堅尼地道15號合和酒店19樓

文：Cathy
相、片：Tom