百利來美食，開飯仔細細個就聽過呢個名啦。由尖沙咀搬到元朗，依然有唔少食客追隨。最近佢地搬到元朗冬菇亭裡面，招牌美食：足料花膠雞湯翅、泰汁炸雲吞、百利炸三寶當然有，而炸物、冷麵、麻辣小食同鮮榨果汁亦繼續供應。鍾意港式小食嘅你不容錯過！
 

百利來美食由尖沙咀百利舖仔到後巷，之後去過元朗鳳琴街地鋪期間限定重開，今年農曆新年擺過車仔檔後，最近終於入到元朗大棠路熟食中心開舖！喺冬菇亭中間位置，行入少少就見到熟悉嘅黃色招牌啦。
 

足料招牌美食

足料花膠雞湯翅（$25）

唔少街坊未坐定就先叫一碗碗仔翅，可見受歡迎程度！雞湯用雞熬煮四個鐘，之後加入冬菇絲、雞絲、花膠等材料。最後放上素翅，可以自由選擇加麻油、浙醋同胡椒粉調味。開飯仔嗰碗足有兩大塊花膠，食落非常滑又夠入味。雞湯素翅本身都有鮮味，漿口但又唔會成口粉，係出色嘅。
 

泰汁炸雲吞（5件）（$20）

招牌上面寫得係「炸物專門店」，嚟到當然唔少得食炸物！炸雲吞建議大家要趁熱食，開飯仔影咗一陣先開始食，幸好都保持到幾脆口。薄脆嘅雲吞皮包住彈牙鯪魚肉，加埋酸酸辣辣嘅泰式醬汁，簡單美味。
 

百利炸三寶（5件）（$25）

再貪心啲嘅話，不妨嗌返份炸三寶，即係炸雲吞、炸釀茄子同炸釀青椒。金黃色又脹卜卜嘅賣相真係令人流哂口水，一睇都知層魚肉夠厚身。同雲吞一樣，釀茄子同釀青椒都係用咗優質鯪魚肉，唔會溝咗一堆粉保持彈牙。唔想食茄子或者青椒？同老闆娘講聲就幫你換啦。
 

惹味香口炸物

黃金炸燒賣（8粒）（$20）

又一碟一定要趁熱食嘅小食，因為啱啱炸起脹卜卜口感最好！燒賣表面灑上椒鹽調味，離遠都聞到呢陣誘人香氣。燒賣皮炸到香脆煙韌，裡面就依然柔軟，口感層次分明。
 

自家製辣椒菜脯

識得食，一定要點餐廳自家製嘅辣椒菜脯嚟食！用上泰國辣椒粉、辣椒、蝦米、魚乾、菜脯、炸蒜等炒香，有辣勁之餘又有蝦米同魚乾嘅香味，再加埋菜脯嘅鹹香同爽口，令平時唔係好食得辣嘅開飯仔都忍唔住一邊嗌辣一邊係咁點嚟食。
 

椒鹽四季豆（$20）

另一推介係椒鹽四季豆，炸四季豆依然保持Juicy，加埋椒鹽嘅鹹香估唔到咁夾。上面再加蒜蓉，係就係重口味咗少少，但食下一條食下又一條好快又會清哂㗎啦。
 

其他小食+飲品推介

雞絲冷麵（$25）

冬菇亭無冷氣，除咗吹風扇之外，仲可以考慮食份冷麵消暑。冷麵可以選擇配麻辣汁或者麻醬，前者自家炒製辣得嚟符合香港人口味，後者係相當香口嘅芝麻花生醬。不過今次食到嘅麵腍咗少少，而且唔夠凍，要扣分。雞絲不過不失，配埋爽口嘅青瓜絲再撈埋醬食，拉上補下都可以一試嘅。
 

鹹桔仔（$17）

食咗咁多炸物，係時候飲返支鮮榨果汁喇。老闆娘推介畀開飯仔嘅呢支鹹桔仔係自己醃嘅，一飲就飲得出足料：真係幾鹹又幾多渣下！但飲飲下習慣之後覺得真係幾解膩，而且唔知係咪心理作用呢，好似真係飲完之後，食幾多炸物都覺得無咁熱氣。
 

冬菇亭新店開咗幾日，已經吸引到唔少街坊嚟食兼買外賣帶走。所以溫馨提示返大家，呢度下晝5:30先開，營業至凌晨1:00。人多嘅時候畀多少少時間同耐心等候，雖然舖頭有幾部大風扇，但如果你怕熱嘅話，不妨考慮自備風扇仔嚟呀。
 

百利來美食
元朗大棠道熟食市場C6號舖

文、相、片：Cathy