一杯好茶唔單止係味蕾上嘅滿足，亦係畀大家一個忙裡偷閒嘅空間！呢間茶館最近到尖沙咀開外帶茶飲吧，有駐店茶藝師沖泡茶飲，唔少仲係主打輕養生，低糖配方再配搭唔同功效嘅食材，Tea Lover必到呀。
 

Tea Express Bar by Jrink位於尖沙咀K11，係大坑:jrink茶室旗下嘅新品牌。店面唔大，但特別將Marco機器放喺吧枱上，呢部機可以嚴格控制水溫，茶藝師會以茶筅手打日本茶或現泡原片茶葉，客人亦多個空間可以同茶藝師互動。
 

抹茶芝士丸丸（$42）

選用日本百年茶舖土橋園嘅靜岡有機抹茶粉，由茶藝師會以茶筅手打，再加北海道特選3.6牛乳同奶蓋。另一特別之處係用日式甜品常見嘅白玉取代珍珠。飲落抹茶清香突出，帶少少鮮味甘甜。芝士奶蓋亦夠厚身，飲落幼滑討好。白玉軟糯，相信再煙韌啲會更好。
 

芝士草莓幫幫（$42）

用直送新鮮嘅士多啤梨打成細碎嘅紅色沙冰，加上用法國芝士做嘅奶蓋，再喺上面用原粒士多啤梨同糖霜點綴，紅白賣相非常搶眼！士多啤梨沙冰酸甜清新，味道自然。而芝士奶蓋夠厚身，有芝士奶香同少少鹹香，加埋一齊甜而不膩。
 

 

芒果雪葩香橙紅茶（$42）

新店有三款以日本紅茶為主嘅特飲，日本紅茶嘅特色係因為當地晝夜溫差小、日照時間短，因此澀味少比較溫和。呢杯就搭配比利時品牌Glacio嘅阿芳素芒果雪葩、新鮮芒果粒同香橙片。紅茶飲落的確比一般港式或者英式紅茶溫和而不失香醇。芒果雪葩同芒果肉亦相當香甜，同紅茶特別夾。
 

伯爵朱古力（$40）

以英國皇家伯爵紅茶配搭比利時黑朱古力，難得嘅就算係凍飲，伯爵茶獨特嘅佛手柑香味依然明顯，加埋朱古力嘅甜香配搭唔錯。因為飲品本身係低糖配方，特別加上特大嘅棉花糖增加甜度，咁就既飲到茶嘅清新，味道又唔會太淡啦。
 

其他飲品亦有心思，例如日本檸檬蘇打（$38）就加咗骨膠原珠珠，紫薯3.6牛奶（$40）就落足50克紫薯蓉。新店開張買任何飲品都會送一個環保杯套，亦有一系列嘅茶包畀大家買走，例如土橋園嘅即溶茶粉，鍾意飲茶嘅朋友唔好錯過。
 

Tea Express Bar by Jrink
地址：尖沙咀河內道18號K11購物藝術館2樓201號舖

文、相、片：Cathy