牛肉就成日都食，但溫體牛你又食過未？所謂溫體牛即係前一日夜晚或者深夜先劏嘅牛，因為夠新鮮所以無經過任何冷藏，所以仲保持到肉質本身嘅鮮甜度同嫩度，食落重牛味之餘又多肉汁！今次就同大家介紹台北兩間溫體牛專門店，食下真正新鮮嘅牛肉！
溫體牛巷弄小店 牛窟溫體牛肉（Click入網上訂座）
呢間溫體牛小店位於小巷入面，但經常都一位難求，餐廳有小炒有小火鍋，小菜推薦霜降牛肉湯、空心菜牛肉同水煮牛，霜降牛肉湯用天然蔬果同牛大骨熬製嘅牛肉湯頭，再搭配溫體牛肉，好清甜，牛肉軟腍，係必叫之選！
空心菜牛肉，牛肉片片到好薄，但仲食得出牛肉嘅鮮味，配埋空心菜一齊炒，夠哂鑊氣！中意食辣就要叫依個水煮牛，麻度恰到好處，食食下先會慢慢滲出辣味，店家特登連埋肥嘅部份一齊炒，食落口有卜滋卜滋嘅口感，送飯都好啱。
圖：魯智深與二鍋頭
台南直送溫體牛 最牛溫體牛肉火鍋 林森店（Click入網上訂座）
主打麻辣鍋＋溫體牛，麻辣鍋濃度啱啱好，唔會蓋過食材鮮味。溫體牛都好講究，特意選用老闆自己台南牧場養嘅溫體牛，或者金門良金牧場出產嘅溫體牛，保證每日新鮮運到。比起其他，呢間嘅牛肉大大片，輕輕淥個幾秒見到微微紅就食得，仍然保留牛肉嘅鮮甜。建議試埋用溫體牛打成嘅牛肉漿，比起普通牛丸口感更好！
圖：夢與幻的地圖
文：Yanica