香港街市或市政大廈內嘅熟食中心，其實有唔少食店各具特色，而以下呢幾間更主打海鮮𠻹，自問係海鮮控嘅你mark實喇～
大排檔放題 新肥泉海鮮大排檔
圖：官涌市政大廈除咗係運動場熱點，都有唔少人去佢嘅熟食中心。呢間就有小炒、煲仔菜等大排檔風味菜式，好似XO醬爆鮑魚煲嘅鮑魚，大隻飽滿又沾上時蔬嘅香氣；麻辣嗦螺則辣得過癮，嗌返枝大啤更加有風味。如果多幾個人一齊嚟，不妨試小炒加煲仔菜放題，有唔同價位畀你揀，彈性高好多。
蟹主題中泰菜 蟹點
圖：呢間食店有中、泰口味菜式畀你揀之外，仲係以蟹做主題！招牌白胡椒蟹用鐵板呈上，再即席淋上白胡椒汁，香氣散發令人更加食指大動；蟹膏夠鮮味，蟹鉗啖啖肉𠻹。另外本地雞蛋蒸花甲皇、香脆炸蠔餅、薑蔥焗桶蠔都值得一試。
酒家×大排檔風味 三小姐海鮮小菜
圖：多數喺點心店或酒家出現嘅籠仔蒸海鮮，喺呢度都食到！蒜蓉蒸蝦陳村粉、籠仔糯米蒸蟹鮮味又飽肚；另外仲有黃金魚皮、芝士焗大蝦配伊麵、豉椒炒蜆等選擇。食完惹味菜式，不妨試埋清甜嘅椰皇燉鮮奶潤一潤喉，咁就正餐、甜品直落食晒啦～
文：Cathy
