尖沙咀呢間曾獲得日本大阪米芝蓮二星嘅壽司名店，由鬼才壽司師傅Hiroki發辦， 繼上年推出大閘蟹主題omakase後，今個夏天推出全新中日合璧嘅omakase！餐點加入唔少中式食材，如海參同瀨尿蝦等，有驚喜啊喂！
關東遼參酢凍
選用日本關東遼參，遼參本身味道唔重，口感爽脆，配埋土佐醋啫喱同秋葵一齊食，味道酸酸地夠晒開胃，做頭盤就最啱！
喜知次冬菇壽司
喜知次呢種魚魚脂特別肥厚，師傅用冬菇代替壽司飯，配搭輕輕烤過嘅喜知次，油份慢慢滲入冬菇飯，上面再放上生磨嘅白色芥末，一入口感受到濃濃魚脂香～好滿足啊！
慢煮鱈魚子
鱈魚子係主廚自家製，以法國菜常用嘅方式抽真空，65度高溫慢煮四小時，入口即溶～
海膽、海膽壽司
採用以零污染海洋環境而見稱嘅日本德島赤海膽。赤海膽肉身較厚、味道濃郁，先鮮甜後回甘。建議將海膽放喺手背上食，因為用鐵匙羹會影響赤海膽本身個味㗎～海膽壽司就用來自青森嘅白海膽，大塊啲同厚身啲，而且一樣咁甜！海膽控係咪心心眼咗？
鮑魚及鮑魚肝蛋糕
用嚟自足足有成600g嘅三重縣黑邊鮑 ，鮑魚味道濃郁。清蒸4小時後，喺65溫度下先才可以切，咁先唔會令鮑魚收縮。鮑魚無經過任何調味，食返鮑魚本身鮮甜嘅味道。傳統日本餐廳會將鮑魚肝造成汁，今次師傅突破地將鮑魚肝造成蛋糕，真係第一次見！
瀨尿蝦乾瓢冬菇飯配瀨尿蝦鉗、瀨尿蝦海鮮濃湯
用當造瀨尿蝦肉配以冬菇及乾瓢做成嘅伴飯，瀨尿蝦彈牙鮮甜，做成壽司又幾有驚喜～海鮮濃湯用上魚湯底加瀨尿蝦殼熬製6小時，每一啖都係瀨尿蝦鮮味！
最後食埋個日本靜崗蜜瓜同宮崎太陽之子芒果就完美啦～
呢個Omakase係期間限定，一共有18道料理，由Chef Hiroki香港團隊主理，每位港幣2,980，想食記得打去訂座先啊！
地址: 尖沙咀金馬倫道8號The Otto酒店1樓
文、相、片: Yanica