芝士同撈麵不嬲都係好受歡迎嘅組合！太子最近就有一間新開嘅芝士麵專門店，全部汁醬同調味都係自己調較，食得出大廚嘅用心。同場有埋咖哩撈麵同叻沙，仲有多款惹味小食添！

必試老闆娘私心推薦組合雞扒芝士撈麵加雙蛋($52)，芝士汁係用車打芝士、忌廉芝士同牛油製成，老闆話佢地唔會加任何化學芝士香料，所以食落去芝士味可能無坊間咁濃，但食落去芝士味都重，帶有甜味，而且一啲都唔漏！

雞扒大大件、大廚將雞扒先煎後炸，個皮炸到脆卜卜，肉汁豐富。一定要加埋太陽蛋，流心蛋黃加埋芝士汁，撈麵食真係一流！

中意異國風味就要試下依個咖哩豬扒撈麵($42)，咖哩汁係大廚就自調較，用咗咖哩粉、黃薑粉、芫茜粉、小茴、丁香、蝦米、香茅、辣椒同石栗等多種香料同材料製成，食落去微辣，香料味重。

大蝦叻沙($58)沿用馬來西亞嘅做法，湯底會無咁辣，麵底係摻摻，老闆娘今次又建議大家可以揀公仔麵底，佢話公仔麵特別掛湯，而且撈埋附有嘅森巴醬一齊食會更加香。老闆每日都會去街市買新鮮大蝦，大隻又爽口！

小食推薦香茅脆雞翼($25)同蜜汁龍鬚($45)，雞翼即炸熱辣辣，粉漿超簿食落好脆口，香茅味重，唔駛點汁已經好好味！蜜汁龍鬚魷魚鬚爽口，加埋蜜汁夠哂惹味。中意食芝士同撈麵嘅朋友快啲去會一會佢！

尚鋒味麵館

地址: 太子砵蘭街379號基隆大廈地下E1號舖

文、相、片：Yanica