香港嘅獨立咖啡店越開越多，亦開始有更多唔同風格選擇，例如西營盤呢間新店以澳洲風格為主，採用墨爾本嘅特色咖啡豆，咖啡款式有唔同配搭、濃度，裝修亦以烏魯魯為靈感，用橙紅色及白色為主調，加上植物裝飾同大玻璃窗，簡約明亮又夠舒適。
 

TIL - Today Is Long位於西營盤港鐵站附近，橙白色加上幾何線條嘅門面非常易認，店內空間唔算太大，不過因為樓底高加上採光度足，感覺開揚。主打咖啡、沙律、輕食及甜點，亦有單品咖啡豆可以買走。
 

咖啡分Short Day同Long Day兩部分，前者比較適合Grab & Go，後者就啱晒想喺咖啡店裡面慢慢享受唔同咖啡風味嘅客人。選用墨爾本烘焙商Small Batch嘅咖啡豆，House Blend為埃塞俄比亞及危地馬拉豆拼配嘅Candyman Espresso Blend。風味偏甜，特別係Milk Coffee會有淡淡拖肥香。
 

Magic（$40）

Magic源自於澳洲墨爾本，簡單嚟講可以理解為牛奶比較少嘅Flat White。House Blend咖啡入口先係微酸，再帶去牛奶朱古力同夏威夷果仁嘅風味，餘韻係焦糖嘅苦甜感。味道平衡，所以同唔同食物都夾到。
 

1 Espresso + 1 Drip Combo（$65）

Espresso會用Candyman Espresso Blend，酸味明亮。手沖咖啡現時有兩款選擇：危地馬拉水洗處理嘅Prudencio同埃塞俄比亞蜜處理嘅Ahmed，前者Body較厚而後者相對清爽。開飯仔就試咗Prudencio，口感乾淨偏茶感，聞起嚟帶熱帶水果香，特別係室溫飲嘅時候會有相當突出嘅芒果味，後韻帶甜。
 

Salad Bowl（$98，11:00後供應）

主食推介有分量十足嘅Salad Bowl，可以揀雞肉或三文魚，其他配料仲有粟米、牛油果、雞蛋、蕃茄同泡菜，無論口感同味道層次都相當豐富。
 

 

Honeyham & Cheese Toastie（$68）

輕食就以吐司同蛋糕為主，吐司選用加咗蜜糖嘅酸種麵包，食落帶些微酸甜味道，所以火腿亦特別用Honeyham，配搭口感柔軟而香味濃郁嘅法國布利芝士。
 

Croffle Combo（$78）

Croffle呢個名結合咗Croissant同Waffle，顧名思義即係用牛角包嘅麵團焗壓成鬆餅！而店家嘅麵團係本地每日新鮮製造，掃上蛋漿再焗壓，最後加上唔同配料。Combo就有齊甜鹹兩款口味，分別係Nutella & Banana同Maple Sryup & Bacon。兩款都係無得輸嘅配搭，加上外脆內酥軟又有牛油香嘅Croffle，好滿足！
 

TIL - Today Is Long
地址：西環西營盤皇后大道西172號建興樓地舖

文、相：Cathy