各位韓迷們最近返唔到鄉下，最想念嘅韓國菜係邊味呢？大角嘴新開一間韓式炸雞小店，位置唔多，主要做外賣生意，但短短時間已經於區內建立口碑。店主特意向韓國朋友取經，炸雞外皮炸粉經過反覆試驗，溝入三四種炸粉，保證炸雞炸起後放半小時都仍然香脆！
餐廳一共供應六款口味炸雞，會將雞肉醃過夜，令雞肉更入味，雞肉本身已經帶少少微辣。而且size分一人份、二人份及全雞，自己一個「毒」食都無問題。
蜜糖芥末醬炸雞
店內招牌人氣口味，蜜糖芥末醬自家調配，芥末味同甜味都恰到好處，唔會蓋過雞味。
地道港式鹹蛋黃醬
香港先有嘅鹹蛋黃醬口味，炸雞撈咗鹹蛋黃醬及加上鹹蛋黃碎，有香濃蛋黃味但唔會太膩。
更多【新店直擊】： |
三重混合芝士醬
呢款三重混合芝士醬就啱晒芝士控喇。醬汁加入咗水牛芝士等三款芝士，最後再加上芝士碎，好有「芝」味！
柚子檸檬醬
至於怕太膩嘅女士們，可以試試呢個柚子檸檬醬口味，酸酸甜甜味道清新，食多兩件都唔怕！
地址: 大角咀大角咀道61號地舖
文: Yanica
相、片: Tom Li
