【全球首間摘星拉麵店】蔦
東京米芝蓮近幾年加入更多日本平民美食，而舊年就係車胎人美食推介名單上面嘅蔦今年更升上一星榜，成為全球第一間摘星成功嘅拉麵店。佢地嘅拉麵堅持以石臼研磨嘅日本國產小麥製作，口味主要分醬油湯、鹽味湯同沾麵。
地址：東京都豊島區巣鴨1-14-1
電話：03-3943-1007
圖片來源：ramenislove
【高品質熟成和牛取勝】中勢以 内店
日本和牛品質之高，連米芝蓮都有目共睹。中勢以内店外表係一間高級肉店，穿過肉店其實係一間扒房，供應熟成和牛。和牛嘅品種選擇咗但馬血統黑毛和牛，係日本三大和牛品種之一，經過四至八星期嘅熟成過程後，和牛嘅香味更濃縮，客人仲可以自己選擇想食嘅位置。
地址：東京都文京區小石川5-10-18
電話：03-3830-0490
圖片來源：Elle Japan
【新上榜新式法國菜】Tirpse
餐廳精選當造食材，菜式以加入北歐風格嘅新派法國菜為主，餐廳裝修風格亦優雅時尚。主廚中村樹里子師承三星餐廳Quintessence主廚岸田周三，難怪出品水準受到眾多食家認同，首度打入米芝蓮就得到一星。
地址：東京都港區白金台5-4-7
電話：03-5791-3101
圖片來源：Tirpse
【港人主廚分子料理Bar】Tapas Molecular Bar
東京米芝蓮出現香港人蹤影！皆因Tapas Molecular Bar主廚喺香港出世，以壽司吧枱形食喺客人面前現場製作多款分子料理，米芝蓮形容吧枱就係廚師們嘅舞台，而製作過程就係廚師們嘅表演。以分子料理手法製作嘅菜式，無論口感同味道都有全新刺激。
地址：東京都中央區日本橋室町東京文華東方酒店38樓
電話：03-3270-8188
圖片來源：東京文華東方酒店
【一期一會隱市日本小店】La Bombance
一期係指人嘅一生，一會係只有一次相會，La Bombance主廚岡元信就係抱住呢種精神，以佢嘅專注細心，同獨特嘅創意獻上各種美食。菜式多以傳統日本菜烹調手法，但加入多款日本菜罕見食材，有食家評論呢間餐廳係新日本料理嘅代表之一。
地址：東京都港區西麻布2-26-21 B1樓
電話：03-5791-3101
圖片來源：Savor Japan
【兄弟班休閒意大利菜】Icaro
大廚喺意大利有七年經驗，而佢嘅哥哥就係餐廳經理兼葡萄酒鑒賞員。菜式以北意大利菜為主，米芝蓮就推介咗當中燉北海道鹿肉闊條麵。餐廳裝修休閒簡約，而且供應意大利及其他世界各地美酒，配搭佳餚相得益彰。
地址：東京都目黒區上目黒2-44−24 4樓
電話：03-5724-8085
圖片來源：Savor Japan
【連續9年上榜高級西班牙菜】小笠原伯爵邸
餐廳由擁有75年歷史嘅小笠原府邸改建，從裝修到擺設都非常高級優雅，置身當中彷如變身成為古代貴族。主廚有非常豐富嘅經驗，當中包括西班牙一星餐廳L'Esguard，成功將日本食材融入西班牙菜。餐廳從08年開始，連續9年都獲得米芝蓮一星肯定。
地址：東京都新宿區河田町10-10
電話：03-3359-5830
圖片來源：小笠原伯爵邸
【廣式蒸魚點心小店】瑞雪
東京有唔少中式餐廳，舊年首度奪星而今年成功蟬聯嘅瑞雪，賣嘅就係香港人非常熟悉嘅廣東菜。餐廳主打海鮮，從日本沿海嘅益田市引入多款鮮魚，無論做刺身，清炒或者清蒸都非常推薦。米芝蓮亦有推介瑞雪嘅點心，而日本網民大部分就推介擔擔麵。
地址：東京都世田谷區梅丘1-20-13 2樓
電話：03-3428-1415
圖片來源：ぐるなび
【清酒加持美味居酒屋】萬屋 おかげさん
舖頭細細，中間係開放式廚房，餐廳以季節蔬菜同本地清酒為主題，清酒種類超過50款。所以大部分人都會選擇由廚師發板，由佢地為客人提供精心配搭過嘅美食同清酒，美食推介之一係佢地一款包含四至五款海鮮嘅刺身拼盤，而且合適嘅清酒絕對可以為美食加分。
地址：東京都新宿區四谷2-10 B1樓
電話：03-3355-8100
圖片來源：萬屋 おかげさん
【香港有分店！江戶前傳統壽司店】とかみ(Tokami )
香港人熟悉嘅日本菜當然包括壽司，喺咁多間壽司店當中Tokami可以脫穎而出，係因為店主佐藤博之自小家族就係做壽司店。餐廳當中以吞拿魚壽司最多粉絲支持，因為餐廳選用築地最高級嘅藍鰭吞拿魚，以優質食材展現江戶前傳統壽司文化。
地址：東京都中央區銀座8-2-10 B1樓
電話：03-3571-6005
圖片來源：とかみ
隨時接收最新資訊
讚好OpenRice專頁！
關鍵字
東京
米芝蓮
2016
複製到剪貼簿