台灣珍珠奶茶始祖終於開到去銅鑼灣啦！以後港島區嘅朋友掛住正宗台式珍珠奶茶就多個選擇啦。銅鑼灣店亦係人文茶館，即係有堂食位同供應多款台式料理，仲有香港限定甜品。不過最近最受歡迎嘅，就要數到銅鑼灣店率先推出嘅薑母系列！
 

春水堂港島首店位於銅鑼灣希慎廣場，半開放式設計增加空間感。銅鑼灣店會獨家率先推出薑母系列，香港其他分店暫定12月先有得賣呀。
 

薑母珍珠奶茶（$37）

選用優質薑母全人手製作，薑辣素成分夠高，配合品牌嘅招牌奶茶就中和返薑母嘅辣勁，口感順滑而入口。加上粒粒煙韌Q彈嘅珍珠，有嘢飲又有嘢咬感覺特別爽。加上薑母可以幫助大家驅寒，改善手腳冰冷，女仔飲多幾杯都得。
 

薑母檸檬（$35）

而呢杯就可以試到薑母本身嘅辛辣同香味！入口先係薑母嘅辣味，再有台灣出產檸檬嘅酸味同清香，增加味道層次之餘仲有生津嘅感覺。提提大家四款薑母系列茶飲每日限量供應。
 

 

檸檬蜜凍飲（$33）

鍾意飲酸酸甜甜嘅嘢，仲有蕃茄蜜凍飲（$36）、檸檬蜜凍飲等選擇。檸檬蜜凍飲嘅檸檬清香突出，帶少少台灣蔗糖嘅甜味，唔會得個酸字，感覺清爽。
 

珍珠茉香奶茶（$34）

平時飲得珍珠奶茶多，都可以試下轉下口味，茉香奶茶指嘅係將茶底由一般泡沫紅茶改為茉莉綠茶，味道少一分濃厚但多一分清香。而珍珠嘅大細同做法都跟返元祖做法，選用天然樹薯粉，唔加任何防腐劑或香精。
 

豬手魯肉便當（$92）

同觀塘店、東涌店一樣，呢度一樣供應各款台式料理，包括小食、滷物、湯麵等。其中一個推薦係台式便當！好似呢份豬手魯肉便當就有齊慢煮滷水豬手、魯肉飯、青菜、貢丸湯等。豬手慢煮後非常入味軟腍，特別係豬皮入口即化。而魯肉飯亦相當香口，而且分量啱啱好夠撈飯。
 

珍珠熔岩蛋糕（$58）

銅鑼灣店供應四款香港限定甜品，呢款珍珠熔岩蛋糕就最啱「相機食先」，鐵觀音蛋糕上面係忌廉、珍珠同黑糖漿，蛋糕係圓環狀所以切開裡面嘅忌廉同珍珠就會跌落嚟！蛋糕鬆軟而且珍珠增加口感，略嫌黑糖漿太甜蓋過蛋糕茶味。
 

春水堂
地址：銅鑼灣軒尼斯道500號希慎廣場3樓317-319號舖

文、相、片：Cathy