冬天，就係食芝士火鍋嘅季節，食完個人特別暖笠笠！喺銅鑼灣開業十幾年嘅天婦羅餐廳天扶良最近就推出咗天婦羅芝士火鍋！餐廳主廚擁有30幾年經驗，曾經喺半島酒店、稻菊等知名酒店及餐廳工作，並一直沿用自日本江戶時代嘅傳統天婦羅做法，用蛋白、水等材料溝成粉漿，以頂級芝麻油去炸，炸出嚟嘅天婦羅好薄，顏色亦比較淺白，仲有淡淡嘅麻油香添！

新推出嘅鮮水果天婦羅北海道芝士鍋($280)，採用北海道芝士及其他芝士混合而成，令芝士多啲酸味，質地亦滑溜啲。

而大部分食材包括5款海鮮及3款時令蔬果，分別係蟹鉗、海老、帆立貝、魷魚、瀨尿蝦、蘋果、柿及番茄，有啲食材仲係日本直送到港架，例如番茄來自日本靜岡縣、蘋果來自栃木縣等等。

師傅打開蟹鉗啲殼，直接將蟹肉部分去油炸，保留番無肉嘅鋒利蟹鉗，最啱影相！蟹鉗都幾大隻，食落亦好厚肉，尚算鮮甜，仲有外層薄薄嘅脆炸感，口感豐富。

來自日本和歌山嘅柿肉微甜，清新嘅柿汁令口感fresh啲，食落可解油膩感。

如果唔夠食，可以加錢追加柿、蜜瓜、帆立貝、蟹鉗、蝦等食物，連芝士都可追加架！另外留意番，天婦羅芝士火鍋只限晚市供應。

除咗天婦羅芝士火鍋，餐廳仲推出好幾款創意天婦羅，炸粉薄一薄，又夠香脆，即炸即食不太覺油膩添！

其他天婦羅菜：

開飯仔推介來自日本長崎縣嘅厚切大吞拿魚魚腩($300)，經油炸後，吞拿魚腩仲係「紅粉緋緋」，而且亦見到分佈均勻嘅油花，再淋上自家調配嘅芥末蛋黃豉油，吞拿魚好厚身又充滿油香，好正！

炸雪場蟹蟹蓋($60)做法特別，首先將雪場蟹蟹肉、忌廉、洋蔥、牛奶及香草釀入威化餅殼再油炸而成，威化殼會變得更脆，入面嘅忌廉蟹肉依然濃郁。

以雞肉為主嘅（左）芥末紫蘇葉雞柳卷($50)、（右）日本雞柳明太子卷($50)。

以牛肉為主嘅(左)和牛裡脊肉青蔥卷（$140）、（右）和牛牛柳香蒜脆片卷($180)。

如果你坐喺天婦羅吧，師傅會將天婦羅逐件逐件新鮮炸好再畀客人，可以食到最香脆嘅天婦羅。

天扶良
地址：銅鑼灣恩平道42號亨利中心9樓

文：Joy