銅鑼灣又開咗間人氣拿破崙店啦，今次係嚟自日本，將拿破崙由傳統方形千層酥嘅形狀改成圓形鏤空樣嘅GARIGUETTE，係品牌嘅首間海外分店。除咗跟足日本有8款甜味同4款鹹味選擇外，更特設香港限定口味添啊！

 總經理小林奏代

平時見開嘅拿破崙，多數都係厚厚嘅一層酥皮一層忌廉咁疊成幾層，但呢間拿破崙店就大反傳統，唔止由方形變成圓形，仲要塊餅皮係勁薄身呢。甜味同鹹味用嘅係兩款酥皮嚟，甜味嗰款係鏤空嘅，可以望到夾層嘅餡料，增加視覺效果。而且亦特別加入糖同杏仁再燒過，令餅皮更加甜香。總經理小林奏代解釋設計概念係希望可以方便客人拎住邊行邊食，而且size比臉蛋大些少，好啱打卡。

但要做到呢款薄脆兼鏤空嘅酥皮，都唔容易。店方要使用自家研發並擁有專利嘅機器壓製，以最短時間高溫烘烤，長期保留拿破崙嘅牛油香味，同埋保持口感鬆脆，外賣拎走後4個鐘內先食都不成問題呢。另外由於餅皮非常薄脆，稍為大力少少就好易會碎開，所以同事製作時亦需要好小心同輕巧。

 原味士多啤梨拿破崙

12款口味同日本店一樣，食材大多亦嚟自日本，甚至連員工都有近半係嚟自日本總店，務求盡量可以還原日本嘅味道。當中要數人氣最高嘅必然係原味士多啤梨拿破崙，由日本入口嘅士多啤梨，4季口味會各有不同，例如而家9月食到嘅會係果香濃而帶酸，遲少少秋冬季食到嘅則會糖度較高。

 雙重芝士火腿拿破崙

而開飯仔則私心推介鹹味中嘅雙重芝士火腿拿破崙，用上車打芝士同水牛芝士製作，配搭火腿同黑椒薯蓉，半溶芝士味勁香，所有味道都好夾好平衡。一整好即刻啪開食，仲有拉絲效果添，芝士控實鍾意。

 香港限定口味：奶茶忌廉芒果拿破崙

至於香港限定口味，則係以奶茶為靈感嘅奶茶忌廉芒果拿破崙，芒果酸甜多汁，不過以奶茶製成嘅忌廉則略為淡身咗少少，茶味唔夠突出。幸好有加入埋黑糖核桃，提昇整體口感。溫馨一提，呢款味道暫時每日限量發售約50份，想試嘅朋友仔可能要早啲去啊。

Half Half點餐選擇 ：(自選) 栗子忌廉黑加侖子+伯爵紅茶忌廉杏脯果醬

餐廳更特設Half Half點餐選擇，可以雙拼！8款甜點口味中可任意選2款拼埋一齊，好似栗子忌廉黑加侖子搭伯爵紅茶忌廉杏脯果醬咁，一次過可以試多款味。嚟自法國栗子忌廉，帶有自然甜香，伯爵紅茶忌廉味道則較柔和。

GARIGUETTE
地址: 銅鑼灣百德新街42-48號Fashion Walk地下D號舖

文：Kar
相、片：YanYan