中上環有唔少特色餐廳，元創方呢邊都唔例外，好似呢間新開嘅就集書店同咖啡店於一身，懷舊裝修加上有圖書櫃，可以一邊睇書一邊嘆咖啡兼打卡。小店主要由一位日本男店長同一位台灣少女打理，所以打開Menu仲會發現唔少日本同台灣料理，連飲品都要整到好似藍天白雲咁嚟搶鏡！
 

Garden Meow嘅飲品由台式特調、養生花茶、即磨咖啡到無咖啡因嘅Latte都一應俱全，當中以呢杯「漫步在雲端」嘅冰沙賣相最特別。用藍色糖漿同荔枝糖漿加冰打成沙冰，杯裡面一朵朵白雲其實就係奶油忌廉，而頂部點綴嘅係棉花糖，所以成杯都食得落肚！不過略嫌甜咗啲。
 

另一杯「春風滿面」一樣有白雲裝飾，不過沙冰就換成洛神花口味，飲落無咁甜得嚟，粉紅賣相肯定係唔少少女嘅最愛！不過溫馨提示一下大家，棉花糖一遇水就會溶，相機飲先嘅朋友仔記得動作要快。
 

而食物方面就以定食為主，最豐富嘅應該就係呢份即將推出嘅「草地上的早餐」，有啲似英式嘅All day breakfast，但就將塊麵包改成台灣運過嚟嘅蛋餅！蛋餅裡面裡面夾咗肉鬆同芝士，所以都幾飽肚。負責人仲話盡量爭取之後將腸仔都換成台灣香腸，實行變做台灣版嘅全日早餐。
 

講到台灣菜又點少得香港人嘅另一最愛牛肉麵呢？「滿漢紅燒牛肉麵套餐」有三食：一，直接食清燉湯麵；二，將紅燒牛肉同麵條一齊擺落個細碗裡面做撈麵；三，將成碗紅燒牛肉倒落碗麵上面變成紅燒牛肉麵。
 

另一特別嘅就係除咗梅子醃小番茄呢啲開胃小菜之外，牛肉麵仲會特別附上一小碟酸菜同一小碟辣牛油，可以按自己喜好加到牛肉麵上面，想幾重口味自己話事。 
 

餐廳亦有日本菜供應，呢份「茶燻雞佐烏龍茶漬飯」就係日本男店主嘅出品，茶漬飯用嘅係烏龍茶加木魚花高湯，食落有少少茶嘅回甘但同時唔會有苦味。不過食完茶漬飯再食雞肉就會覺得雞肉嘅茶香無咁明顯。點返少少黃色芥末醬食，味道就啱啱好喇。

餐廳仲有供應嚟自台灣嘅手工啤酒，問過店主佢仲表示之後有意推出日式關東煮，畀大家夜晚嚟一手關東煮一手啤酒咁Chill返晚！細細聲講店主幾靚仔，而且識聽識講廣東話，對餐點有咩意見不妨同佢傾下。
 

無時間坐低慢慢傾慢慢食？餐廳計劃緊之後會推出外賣甜品，好似呢杯泥娃娃咁，其實係一杯用甜筒裝住嘅Tiramisu，裡面有可可粉、Cream Cheese同浸過咖啡嘅手指餅，味道香濃。另外仲有抹茶版，想試就記得留意喇。
 

Garden Meow 喵一下
地址：中環鴨巴甸街35號元創方B座Hollywood地下HG01-HG05號舖

文、相、片：Cathy