煙韌控同甜魔們注意：呢間人氣網店喺旺角開咗實體店啦！每個禮拜唔同口味，當然唔少得最出名嘅流心麻糬曲奇，仲有新出嘅麻糬冬甩。口味選擇又夠多元化，抹茶同焙茶味都係茶香濃郁唔過甜，焦糖燉蛋曲奇就香甜得嚟有層次，當下午茶或者帶去野餐都好啱。
Twinkie Cookies由網店開始，參加過唔少市集亦開過Pop-up店，係本地嘅麻糬曲奇始祖之一，流心麻糬系列更係累積唔少好評。最近終於喺旺角朗豪坊開咗第一間常駐嘅實體店，雖然無座位，但好貼心咁可以幫大家焗翻熱啲曲奇。而曲奇口味每個星期唔同，可以留意返佢哋Instagram睇定想買咩口味先。
Matcha Lava Mochi Cookie（$44）
大獲好評嘅流心麻糬曲奇係每日新鮮製作，抹茶口味選用日本丸久小山園若竹抹茶粉，茶嘅甘甜同澀味平衡，後韻帶少少甜味。曲奇口感偏軟。
最吸引嘅當日係裡面有抹茶流心同自家製麻糬！抹茶流心軟滑富茶香，麻糬非常軟糯。建議大家如果拎返屋企食嘅話可以按建議指示，用焗爐或者微波爐翻熱，流心效果同茶香都會更好。
Hojicha Mochi Dount（$30）
10月新出嘅麻糬冬甩有龍膽抹茶同焙茶兩款口味，冬甩口感比較似扎實嘅蛋糕，外層係茶醬而中間係自家製麻糬。食落有焙茶獨特嘅甜味同烘焙香氣，配埋麻糬整體甜而不膩。
Crème Brûlée Cookie（$35）
同樣係10月新出嘅手工曲奇口味，喺軟曲奇上面加厚滑帶蛋香嘅吉士醬，再灑上砂糖燒成焦糖面。雖然有啲可惜嘅係可能因為擺耐咗，焦糖面已經唔係好脆，不過食落依然有焦香，令曲奇食落味道層次更豐富。
更多【新店直擊】： |
Pistachio Raspberry Cookie Sandwich（$45）
曲奇三文治同樣吸引，呢款係用兩塊開心果軟曲奇夾住粉紅色嘅覆盆子忌廉。曲奇裡面有開心果粒，有咬口之一亦有淡淡開心果香氣，而且因為係軟曲奇，所以三文治厚身得嚟都唔難咬。加上忌廉夾心酸酸甜甜咁，食完一件都唔會好膩。
Earl Grey Chocolate Latte（$48/樽，買曲奇+$38/樽）
Latte用玻璃樽裝住最啱打卡，之前出咗抹茶同玄米茶，最新嘅係呢樽伯爵茶朱古力口味，飲落有朱古力嘅微甜，突出伯爵茶帶佛手柑嘅茶香，餘韻茶香清幽。茶粉都幾多，記得飲之前要搖勻呀。
買嘢可以儲印仔，換手工曲奇或者Latte
Twinkie Cookies
地址：旺角亞皆老街8號朗豪坊B2層38號舖
文、相：Cathy.H