拉麵哥帶過大家食佢心水嘅豚骨湯底嘅拉麵店同沾麵店之後，今次就決定帶大家去兩間過江龍，由日本開分店開到過嚟香港嘅拉麵店，其中一間，可以話係IG界嘅「網紅」添呀！
呢間拉麵店嚟自北海道扎幌，以甜蝦湯底作為主打，每日用大量甜蝦蝦頭新鮮熬製個湯底，原味以外，另外有豚骨蝦湯同濃厚豚骨蝦湯揀。仲有3種調味選擇，分別係鹽味、醬油味同味噌。
拉麵哥點評：
湯底：香港好少主打蝦湯嘅拉麵，呢度用鹽味嚟做default都係一個幾好嘅選擇嚟，蝦湯味道都幾出。在我嚟講，一個好嘅湯底就喺唔鹹、唔油膩嘅情況下都可以呈現到鮮味同香味，而呢個我覺得係偏向少少油膩咗啲嘅。
麵條：麵條有得揀，可以揀幼麵或者粗麵，而粗麵係個好啲嘅選擇，同蝦湯底好配。麵質都算唔錯，算係幾彈牙，因為有時粗麵最驚就係腍晒，但呢個幾好咬口。但就係有少少鹼水味都仲喺度。
地址：灣仔皇后大道東119-121號欣景閣地下B號舖
座銀
呢間就係嚟自大阪嘅過江龍，係IG界嘅寵兒。以雞白湯作為招牌湯底，仲要係好似cappuccino咁，一上枱嗰陣係起泡㗎！靚仔到！舖頭有拉麵亦有沾麵食，每碗嘅賣相都經過師傅用心擺碟，味道亦相當唔錯。其中跑馬地分店每個月仲會有唔同嘅期間限定款式。
拉麵哥點評：
湯底：我覺得呢一個雞白湯嘅湯汁都幾強下，嗰個味道有啲似中式老火湯同法式蘑菇雞湯in between嘅東西嚟，幾濃厚之餘都幾順滑，仲有啲雞肉碎喺入面，係幾好食。
麵條：碗底冇任何積水，過冷河做得好，麵質本身有蛋香味。
跑馬地店：跑馬地景光街13號地下A舖
中環店：中環歌賦街7號地舖
文、相：Kar
