各位甜品迷、特別係鍾意食茶味甜品或者日式卷蛋嘅朋友仔注意：呢間人氣卷蛋網店喺觀塘開設第一間實體店啦！最近仲同紐西蘭奶製品品牌聯乘，推出期間限定嘅日本玄米茶奶蓋卷蛋，茶味濃郁玄米茶忌廉加上微鹹柔滑嘅芝士奶蓋，層次豐富。仲有多款熱賣口味，全部採用0卡稀少糖及少油少糖配方製作，甜而不膩。

Happy Roller係傳統麵包老店開心餅店嘅副線，由餅店第二代主理，主打日式卷蛋，網店兩年前開設至今依然大受歡迎，高峰期要訂卷蛋要等成兩個月先有貨！最近於觀塘工廈開設實體店，仲同安佳（Anchor）聯乘，用安佳牛奶、淡忌廉、忌廉芝士等製作期間限定卷蛋。
 

日本玄米茶奶蓋卷蛋（期間限定，$168）

安佳聯乘限定口味，外層係濕潤鬆軟嘅東方美人茶戚風蛋糕，裡面係用咗日本進口玄米茶製作嘅玄米茶忌廉。忌廉口感綿密輕盈，每食一啖茶香就會喺口腔中堆疊上去，加上忌廉嘅微甜同奶香，啖啖滋味。
 

玄米茶芝士奶蓋會另外用袋裝，畀大家自行添加，奶蓋質地濃稠厚滑，帶微微鹹味，配卷蛋一齊食可以增加味道層次，同時亦有帶起玄米茶清香嘅效果！想試嘅話留意返8月2號開始接受訂購，暫定供應兩個月至10月2號。
 

丸久小山圓抹茶x靜岡焙茶生乳卷蛋（$158）

佢哋嘅抹茶、焙茶、鐵觀音、柚香金萱茶等茶香口味都特別受歡迎，貪心啲就可以揀呢個有齊抹茶同焙茶嘅口味！裡面嘅丸久小山圓抹茶忌廉有抹茶獨特Umami鮮味、回甘悠長，靜岡焙茶忌廉就有烘焙香、茶味帶甜，兩款茶味都好濃，唔會有蓋過嘅情況。
 

竹炭海鹽Oreo生乳卷蛋（$108）

呢款就用竹炭蛋糕卷住海鹽Oreo忌廉，海鹽嘅鹹味可以平衡返Oreo嘅甜膩，而Oreo餅乾碎同時又增加酥脆口感，食落無咁易膩。提埋大家，如果鍾意口感再豐富啲嘅話，訂嘅時候可以要求加麻糬（+$15）喺忌廉中間㗎。
 

 

原味牛乳生乳卷蛋（$108）

想食Light啲嘅話，現時11款常設口味中可以試下原味，中間嘅牛乳忌廉柔滑富牛奶香，同有淡淡蛋香嘅蛋糕一齊食，簡單而滿足。
 

提埋大家食之前記得將捲蛋放喺室溫解凍5-10分鐘，咁樣忌廉口感先係最理想嘅柔軟狀態呀。
 

（左）安佳 x Happy Roller別注版保溫袋，（右）安佳牛牛霓虹燈打卡牆
 

Happy Roller
地址：觀塘成業街11-13號華成工商中心4樓10號舖
*日本玄米茶奶蓋卷蛋只限2/8至2/10供應

文、相：Cathy.H