對於戒牛人士嚟講，好多時都食唔到越南河，因為正宗嘅越南河湯底係用牛骨牛腩等材料煲成。尖沙咀呢間越港式餐廳，主打嘅就係一款無牛成份嘅越南河，老闆Jacky用其他材料，成功煲出一款無牛、但味道同正宗越南湯底相似嘅無牛越南河！就算戒牛人士都可以一嚐正宗越南pho嘅滋味！
老闆Jacky話，佢有呢個idea係因為太太阿Ling就係其中一位好鍾意越南湯河嘅戒牛人士，太太一直都好掛住越南湯河嘅味道，自己曾經嘗試過用雞及其他肉類去煮，但可惜味道完全唔同。所以老公Jacky就邀請其越南廚師朋友研究，佢相信除咗太太，一定仲有好多戒牛人士鍾意越南湯河。經過多番嘗試，終於用超過20款材料調較出近似牛湯但又唔係牛湯嘅越南河粉！
雞絲扎肉河湯底用上多款藥材，如小皮、八角、花椒丶香葉、胡椒粒、黑椒粒及薑等，再加上豬骨、雞骨及金華火腿，湯底補而不燥，潤而不膩。雖然比牛骨湯清淡，但戒牛人士絕對搵得返回憶中嘅味道。
最特別係餐廳雖然主打越南菜，但竟然有燒味食，而且仲要係每日即燒㗎！即燒燒味同區嚟講真係比較少見，而且價錢合理。燒鵝皮脆肉香，叉燒亦肥瘦均勻，有陣陣蜜汁香。
媚公河大頭蝦選用新鮮大頭蝦，沿用法式製法，先炒香啲蒜蓉，加入牛油，大頭蝦新鮮彈牙，好惹味。
咖哩亦係老闆拿手菜式之一，咖哩香而不辣，牛腩炆約3-4小時，軟腍而唔痴牙，牛筋部位亦腍而有咬口。
地址: 尖沙咀漢口道38-40號漢興大廈地下C,D及E號舖
文、相、片: Yanica