負責人Mike（右）入廚25年，曾於多間餐廳任職，而家同拍檔阿德（左）喺深水埗開小店主打手工漢堡

麻辣、沙嗲、芫荽，揀邊款好？唔係講火鍋湯底，而係漢堡口味！深水埗呢間新店主打手工漢堡，成日都有唔同嘅創意口味，好似招牌麻堡靈感就嚟自雞煲，麻香層次豐富唔死辣。而芫荽牛堡就有大量新鮮芫荽，加埋芫荽青醬雙重香味。仲有新出嘅生酮漢堡，照顧埋進行緊生酮飲食嘅街坊呀。
 

每日兩輪製作漢堡扒，足150g加上人手「噠」肉，可以鎖住肉汁而且令口感更彈牙

麻堡位於深水埗青山道，主打手工漢堡，定價親民。特別在每日手打安格斯漢堡扒，用咗西冷同肥牛以特定比例混合，靈感係嚟自小籠包，肉餡有少少肥肉食落更Juicy！每日兩輪新鮮製作，每塊足150g，而且都要人手「噠」肉，目的就係打出牛肉嘅膠質同筋性，將空氣打出嚟，煎完肉汁都唔會流失，牛香濃郁、非常彈牙。
 

芫荽安格斯牛肉漢堡（$78，升級套餐+$10起）

本來係期間限定，因為太受歡迎而家正式列入常駐Menu啦！醬汁以西式青醬為藍本，用芫荽加洋蔥、香草、黑椒等打成芫荽醬。配搭羅文生菜、紫洋蔥、蕃茄、手打安格斯漢堡扒，同大量新鮮芫荽！
 

芫荽醬每日新鮮製作保持翠綠，食落芫荽獨特香氣突出。而新鮮芫荽就增加爽口層次，食落相當Refreshing，又唔會搶走牛肉嘅肉香。
 

沙爹安格斯牛肉漢堡（$78，升級套餐+$10起）

大受歡迎而有得留低嘅仲有呢款沙嗲安格斯牛肉漢堡，沙嗲醬走港式茶餐廳風格，用蒜蓉、沙茶醬、花生醬、椰漿製作，花生香濃郁帶微辣，可以帶出牛肉香味！
 

150g嘅漢堡扒相當厚身，因為經過人手「噠」肉，食落非常鬆化唔死實，中間仲保留到大量肉汁，啖啖脂香同肉香平衡，同時就算外賣拎到返屋企麵包都唔會因為流出嚟嘅肉汁而變腍。
 

 

麻辣雞排漢堡（$58）

招牌麻辣口味用嘅麻辣醬亦由負責人自家研發，靈感嚟自四川麻辣雞煲，特別在加咗坊間較為少用嘅藤椒油，令醬料香、麻，而唔會太嗆喉或死辣，配搭青花椒、川花椒等香料同雙豆瓣醬，請香港一間老字號醬料廠代為製作。

辣度由小至大辣任君選擇，建議大家試中辣，辣勁唔算好強烈，但麻味後勁十足！雖然越食越辣，但加埋皮脆肉嫩嘅雞扒又真係幾過癮。
 

煙肉安格斯牛肉生酮漢堡（$98，需預約）

Mike留意到唔少客人都進行緊生酮飲食，嚟到只可以食漢堡扒但要走包真係好可惜，所以就新研發咗呢款生酮漢堡。麵包自家製，用車前子粉、椰子粉、杏仁粉等製作，唔落麵粉所以低碳水化合物而且仲係無麩質！口感類似歐式麥包，有顆粒感亦有咬口。

配料除咗蔬菜同手打漢堡扒，仲特別加咗煙肉，增添香氣之餘仲增加油脂。不過因為自家烘焙嘅生酮麵包數量非常有限，想食記得早一日打電話預訂定先呀。
 

海苔岩鹽雞翼，蜜糖芥末雞翼（各$28/3，$38/5）

漢堡之外仲有冷泡茶、特飲、小食等供應，熱賣之一就係海苔岩鹽雞翼，選用台灣嘅海苔粉，食落鹹香自然，仲有少少鮮味，同香口嫩滑嘅炸雞翼好夾。而蜜糖芥末醬甜中帶微辣，同樣惹味。
 

麻堡
地址：深水埗青山道153號地下B號舖

文：Cathy
相、片：Tom Li