鍾意食魚嘅朋友仔，有冇食過虱目魚？呢種魚喺香港比較少見，但喺台灣就係好受歡迎嘅平民魚料理嚟。最近，台灣百年老店度小月喺香港再開多間分店，同時新推出咗4道虱目魚料理呀。

新店位置喺銅鑼灣時代廣場，同尖咀店一樣，可以睇到師傅製作擔仔麵嘅過程。

而除咗擔仔麵呀、三杯雞呀、炙烤胡椒肉呀呢啲原本都有嘅人氣菜式之外，新店仲有幾款限定菜式，係要過海嚟呢邊先食得到，介紹其中兩道過你哋：

台灣蚵仔煎就食得多，咁蒜泥鮮蚵呢？油炸鬼、豆腐伴埋大大隻蚵仔，上面仲有唔少蒜泥醬，一啖夾晒入口食，好豐富嘅感覺。而且蒜香令蚵仔嘅鮮味更突出，由於份量唔算多嘅關係，一啖一啖咁好快清晒一碟。

香蔥脆皮炸大腸亦係新店限定菜式，每條腸中間都夾咗京蔥，有助辟除咗大腸嘅腥味，食起嚟幾爽脆，但就略嫌乾身咗少少。

至於一開頭講過嘅虱目魚，就有4種食法，包括豆豉、清蒸等。香煎都係個好選擇，呢種魚魚質鮮甜，肉感實在，魚皮煙韌，兼且啖啖滲出魚油香味，重點係，本身好多細魚骨㗎佢，但師傅全部拆走晒，食起上嚟好方便。

用嚟熬魚湯一樣咁鮮甜，呢碗虱目魚湯幾足料呀，好清甜，記得要食埋啲湯渣呀，精華嚟。

度小月
地址：銅鑼灣勿地臣街1號時代廣場B2樓B215號舖

文、相：Kar